Одбыла ся членьска громада Руського клубу 1923. Од Руського дому далше не має ключі

В четверь 5-го септембра 2024-го року одбыла ся в Пряшові членьска громада єдной із найстаршых фунґуючіх русиньскых орґанізацій на Словакії – Руського клубу 1923. Членьску громаду на oснові станов і рішіня Выконного выбору скликав председа орґанізації Федор Віцо.

На громаду, котра мусила быти „в гостях“, в рештаврації Baltic, пришло понад 70 процент членів Руського клубу 1923. Почас засіданя голосовало ся і о приятю новых особ, котры проявили інтерес о членство в орґанізації.

Потішуючім фактом є, же покликаны были вшыткы членове Руського клубу, кедьже в попереднім періоді председам, наперед Анні Ґальовій, пак Феодорови Віцови, хыбили комплетны спискы од бывшого довгорічного председы Гавриїла Бескида, што ся теперь подарило скомплетізовати.

Членове дістали інформацію о діятельности і господаріню

Почас членьской громады участны могли выслухати інформацію о діятельности Руського клубу 1923 за рокы 2022 і 2023, яку прочітав Федор Віцо, а пак і Справу контрольной ревізной комісії, котру прочітав председа комісії Станіслав Конечный.

Хоць, як было і чітане в окремых інформаціях, суд уж давніше дефінітівно вырішыв, же єдинов леґалнов орґанізаційов з назвов Руськый клуб 1923 є орґанізація, котру веде як председа Федор Віцо, орґанізації дотеперь не подарило ся здобыти приступ до Руського дому.

І кедь проходили в данім періоді засіданя Выконного выбору, веджіня Руського клубу 1923 концентровало ся головно на тоту проблему, жебы правнов путьов знова здобыти приступ ку маєтку, о котрый бы ся орґанізація мала старати, і кедьже якраз на тот ціль была в 1923-ім році основана, жебы была господарьом Руського дому, покля Общество імени Александра Духновіча буде в нім робити културно-обществену і освітню діятельность.

Руськый клуб 1923 вдяка тому, же іщі все є без свойой будовы, не міг робити жадну іншу діятельность, а в данім періоді не мав ани властный банковый рахунок.

Членьска громада на кінцю заголосовала за план діятельности і розрахунок на рік 2024. Членове были згодны, жебы Руськый клуб 1923 зробив властный банковый рахунок, і встановило ся членьске в сумі 5 евр на рік.

Секерак вмер, но Руськый дім не маєме

Кавза коло Руського дому в Пряшові ся тягне уж майже 20 років. Спор почав у 2005-ім років, коли Штефан Секерак скликав „членьску громаду“ Руського клубу 1923, на котрій не были участны досправдовы членове той орґанізації, але новы люди, і зохабив ся зволити за председу.

На єдні боці „Секераковці“, на другім боці „Бескидовці“, під веджіньом Гавриїла Бескида, почали довгы судны споры о то, котра орґанізація є леґална. Но Секерак, котрый ся ку будові дістав нелеґално, із своїм „Руськым клубом 1923“, наперед змінив становы орґанізації, і у фебруарі 2006-го року основав Фундацію Руського клубу 1923, на котру перевів маєток – будову Руського дому.

Будова, на котру зберали грошы од 1923-го року русиньскы інтелектуалы, еміґрація в Споєных штатах Америкы але і простый народ по селах, і котра мала служыти, а і служыла як народный дім, так зістала заперта про узкый округ людей коло Штефана Секерака, якый там не допустив ани русиньскы події, аж на пару вынятків, ани жебы там могли мати свої просторы русиньскы орґанізації.

Днесь уж Руськый клуб 1923, котрый моментално веде Федор Віцо, має в руках документы, котры свідчать о тім, же якраз тота орґанізація є єдина леґална. Но і кедь тото было потверджене державныма орґанами пару років тому, до будовы ся Руськый клуб 1923 далше не дістав, бо Руськый дім є, за поглядами державных орґанів, маєтком Фундації Руського клубу 1923. Секерак, котрый быв справцьом фундації, так далше „ґаздовав“ на русиньскім народнім маєтку.

Початком 2024-го року Штефан Секерак вмер. Председа Віцо докінця мав пару днів ключ од головной браны, не од далшых просторів, но наконець знова зістав без приступу до будовы. Замок быв вычеряный.

У фебруарі уж быв зареґістрованый на Міністерстві внутрішніх справ Словацькой републікы новый справця фундації – Штефан Секерак молодшый, сын попереднього справцю. Руськый клуб 1923, котрый мав быти зряджовательом фундації за часів Секерака, поважує тоту зміну на посаді справцю за неплатну. Выконный выбор орґанізації на єднім із своїх засідань, у януарі того року, докінця мав властну номінацію на справцю фундації.

Но фактом є, же і далше Руськый клуб 1923 і його членове не мають приступ до будовы, і Руськый дім, так як за попереднього справцю, зістав запертый про Русинів, і обще. Міністерство, котре бы в тім могло вырішовати, дає од рішіня рукы гет, на што уж мож было привыкнути при державных орґанах в тій справі звыкли за майже 20 років боротьбы за народный маєток.

Членьска громада прияла можливы рішіня

О тім, як бы ся далше могла рішыти проблема Руського дому, была якбач найдовша діскусія на членьскій громаді. Наконець было прияте узнесіня, котре має што до проблемы будовы штири пункты.

Членове Руського клубу 1923 дали Выконному выбору задачу выбрати адвоката, котрый подасть на суд діла в справі того, жебы было переведжіня маєтку на фундацію выголошене за неплатне, і жебы ся встановило, хто має права властника.

Выконный выбор так само дістав од членів орґанізації мандат, жебы ініціовати і вести переговоры з Фундаційов Руського клубу 1923, з цільом закінчіти спор мімосудно. Значіть, покля бы Руськый клуб 1923 здобыв контролю над будовов.

Выбор має так само од членів повіріня, жебы ініціовати крокы на зрушіня фундації міністерством або судом зо закона, з причіны порушованя закона о фундаціях. На членьскій громаді бісідовало ся о тім, же Фундація Руського клубу 1923 реално не выконує добродительскы діла, і то є так важне порушіня закона, же бы мала быти зрушена.

З тым є повязаный і четвертый пункт узнесіня, в котрім членове повірили Выконный выбор подати вызву на Міністерство внутрішніх справ Словацькой републікы, жебы была схвалена пропозіція Додатку чісло 2 фундаційной листины Фундації Руського клубу 1923 із дня 19-го януара 2024 з причіны грубого порушіня фундаційной листины.

Як сьме ся дізнали од председы Руського клубу 1923 Федора Віца, фундація посередництвом свого адвоката і далше робить крокы, жебы заборонити приступ до Руського дому і спохыбнити властництво будовы, на котру оправданы претензії робить собі Руськый клуб 1923, зато о далшых діях в тій справі будеме інформовати.