Сумар дня на 9. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 9. вересня/септембра 2024 р.

Раді Влады СР про нацийональны меншыны буде предсідал премєр

Як поінформувала пресова аґентура Словацкой Республикы (TASR), Раді Влады СР про нацийональны меншыны буде предсідал премєр. Підпредседом буде полномічный влады СР про нацийональны меншыны. Представникы поєдных меншын вытворят в раді 27-членну комору. Представників нацийональных меншын будут номінувати до коморы орґанізациі анґажуючы ся в обшыри підпоры і розвитку нацийональных меншын так, жебы мадярска меншына мала семох представників, ромска штырьох, русиньска трьох, чешска і украіньска по двох, а німецка, польска, моравска, росийска, болгарска, хорватска, жыдівска, сербска і вєтнамска по єдным представнику. В раді будут робити і представникы рады за центральны орґаны штатной справы і сталы члены рады без права голосуваня. Рада Влады СР про нацийональны меншыны буде експертскым, порадным, координацийным, консультативным і ініциятивным орґаном влады про справы тыкаючы нацийональных меншын, етнічных ґруп і іх членів, буде полнила функцию експертского орґану до справ імплементациі Европейской карты реґіональных або меншыновых языків і Рамовой Конвенциі о охороні нацийональных меншын.

Вернут пасажерскы желізничны получыня медже Хоцяновом, Пшемковом і Ґлоґовом

PKP Польскы Желізничны Леніі підписали з Маршалківскым Урядом Нижньошлезского Воєвідства, Ґміном Нєґославіце та Міністерством Інфраструктуры інтенцийный лист, завдякы котрому неодолга вернут пасажерскы желізничны получыня медже Хоцяновом, Пшемковом і Ґлоґовом. Як подал нижньошлезскій воєвода Павел Ґанцаж, систематично привертают получыня в реґіоні. То елемент шыршого пляну борбы з комунікацийным выключыньом на Нижнім Шлеску. Інтенцийный лист єст першым кроком для приверніня реченого получыня Хоцянів – Пшемків – Ґлоґів. Желізничны леніі нр 303 Хоцянів – Ґлоґів – Нєґославіце та нр 14 медже Ґлоґовом і Нєґославіцами жде ревітализация, а пак вернут на них пасажерскы получыня. Завдякы задекляруваній спілпрацы жытелі Пшемкова по понад 20 роках будут мочы хоснувати желізницю, а жытелі Хоцянова зыскают получыня аж до Ґлоґова. Нижньошлезскы желізниці задеклярували ініциятиву одкрытя получынь на трасі Ліґниця – Хоцянів – Пшемків – Ґлоґів. Получыня мало бы привернути можливіст штоденных доіздів до працы, школы, але і позитивно влинути на розвиток туристичного руху. Плянувана ревітализация єст важным елементом проєкту розвитку желізниці мідьового басену.

«Лемківскє співаня» на Высокій коло Рудной

Припоминаме, што в найблизшу суботу, 14. вересня/септембра на Высокій коло Рудной одбуде ся дальша едиция подіі під назвом «Лемківскє співаня», якой головным орґанізатором сут лемківскы жытелі Высокой і ґміна Рудна. Подія зачне ся о год. 15.15 хороводом. Пак од 16.00 будут концерты. В проґрамі передвиджено выступы лемківскых і заприязненых ансамблів, а то м.ін. Розтокы, Кычеры, Сасанкы, Дамира, Зазулі і Воронів. Подібні як влони, вчас подіі буде мож посмакувати традицийну лемківску кухню зрыхтувану місцевыма ґаздынями, а тіж ґрузиньску кухню од заприязненых кухарів. Будут і додатковы атракциі, в тым про діти. Подія одбуде ся в центрі села, в місцевым парку. Вступне на подію дармо.