Сумар дня на 6. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 6. вересня/септембра 2024 р.

Ден памяти священномученика Максима Ґорлицкого

Днес в православній катедрі дв. Тройці в Ґорлицях проходят святочны подіі звязаны з праздником священномученика Максима Ґорлицкого. Того рока мият 110 років од розстріляня австрийскыма жандармами о. Сандовича, мученика за православну віру. Тогорічны святкуваня сут повязаны і з 100. річницьом отриманя через православну церкву в Польщы автокефалиі. В звязку з дньом памяти священномученика Максима Ґорлицкого, святочну подію орґанізуют і еміґрацийны кругы зосереджены при американьскым Лемко-Союзі. В найблизшу неділю 8. вересня/септембра в православній церкви в Йонкрес одбуде ся молебен до святого, а пак в парохіяльных просторах пройде історично-культурный проґрам. Доповід на тему жытя св. Максима выголисит діакон Давид Дутканич, якого рід выходит з Лемковины. Молебен зачне ся о 13.00 год.

«Eнді Варголь в моім селі»

Стоваришыня «Руска Бурса» в Ґорлицях просит до участи в плястичным конкурсі пн. «Eнді Варголь в моім селі». До выграня сут цінны нагороды. Іде о зробліня (свобідном техніком) плястичных робіт, котры будут інспіруваны творчістю Енді Варголя. Малюнкы можут представляти сценкы зо штоденного жытя мешканців села, іх роботу, звыкы, ілюструвати архітектуру села ци краєвиды, представляти жытелів сел – портреты. Задачом є зробити іх в такій спосіб, як творил Варголь – попартово. Роботы будут оцінюваны в трьох віковых катеґориях: до 8 років, од 9 до 11 років і од 12 до 14 років. До выграня сут чытникы KINDLE і інчы цінны нагороды. Роботы (велькости А4) треба прислати до 30. вересня/септембра тр. на адрес Руской Бурсы в Ґорлицях. Дрібниці та мотузкы до реґуляміну і згоды на участ дітины в конкурсі найдете в дописі на нашым портали. Роботы будут пак презентуваны в будинку Руской Бурсы в Ґорлицях – вчас вернісажу пройде оголошыня лавреатів і вручыня нагорід. Красні заохочаме взяти участ в конкурсі!

Конкурс на найцікавшу архівальну фотоґрафію Білой Воды

Рушыл черговый проєкт в Білій Воді «Шляком волошской культуры через Білу Воду». Єст він реализуваный неформальном ґрупом як част карпатской локальной ініциятивы фінансуваной з середків Урядового Фонду Громадяньскых Ініциятив за посередництвом Стоваришыня «Pro Carpathia». Цілю нового проєкту єст опрацуваня і поміщыня при выході і в середині долины Білой Воды двох плыт посвяченых істориі і культурі єй давных жытелів. В рамках проєкту фурт мож взяти участ в конкурсі на найцікавшу архівальну фотоґрафію з Білой Воды. Орґанізаторы глядают старых знимок з Білой Воды, найліпше з людми. Найліпшы 3-4 фотоґрафіі будут дармо зревітализуваны і одданы властительови та почестно поміщены на таблици в середині долины і переданы авторови. Зголошыня мож высылати до неділі 15. вересня/септембра. Дрібниці найдете на фейсбуковым сайті: Biała Woda – zapomniana wieś na Szlaku Kultury Wołoskiej.

Завершыня музичного сезону в Вапенным з лемківском музиком

Заран в Вапенным одбуде ся закінчыня музичного сезону в «Кармнику». В рамках подіі выступлят два ансамблі: Терочка з Руской Бурсы в Ґорлицях запрезентує лемківскы пісні, а Бурян выступит з етнічном музиком Карпат. Концерт Терочкы зачне ся о 17.00 год, а Бурян заграт од 19.00.