Як інформовало на своїм офіціалнім сайті Карпаторусиньске общество (Carpato-Rusyn Society), котре діє в Споєных штатах Америкы, орґанізація собі в днях 25-го аж 27-го октобра 2024-го року припомяне 30 років од свого основаня.
Вікендовый проґрам святковань про членів і сімпатізантів буде проходити в Народнім карпаторусиньскім културнім і освітнім центрі (Carpatho-Rusyn Cultural and Educational Center) в Мунгаллі, в Пенсілванії. До святковань є залученый і Карпаторусиньскый дослідный центер в США (Carpatho-Rusyn Research Center) а Фундація Джона і Гелены Тімо (John and Helen Timo Foundation).
Почас святковань буде приступна од пятніці выстава творів карпаторусиньского художника Антоні Кубека, о котрім буде мати в пятніцю лекцію асоц. проф. Др. Ніколас Купеньскый із Академії авіачных сил США під назвов Перед Варголом: Жывот і творчость Антоні Кубека.
Про участників події буде пририхтованый автобус, на котрім почас суботы можуть іти посмотрити хыжу Варголовых в Піттсбурзі, Ґрекокатолицькый храм святого Йоана Крестителя в Піттсбурзі ці Православный храм святого Михаіла в Ранкіні. Субота закінчіть ся юбілейным банкетом.
В неділю одбуде ся 42-ый річник Карпаторусиньскых святковань, котры будуть проходити в Ґрекокатолицькім храмі святого Йоана Крестітеля в Юніонтавні.
Карпаторусиньске общество выникло в 1994-ім році і його цільом є утримованя і сохраніня свойой русиньской културы, історії, языка і наслідства русиньскых предків. Зато общество притовлює многы културны події, але і зберать історічны, ґенеалоґічны, языковы і етно-културны інформації о карпатьскых Русинах.
Колись в друкованій верзії, днесь вже лем електронічно общество выдає од початку свого існованя анґлоязычну ґазету The New Rusyn Times.
Основане было общество в Піттсбурзі, но свої філії має і в далшых містах і штатах як Клівленд, Даллас, Ню Джерсі ці Ню Йорк.