Низкій Бескід і Бєщады з інновациями

Подля ріжных рахунків коло 1,8 мілийона осіб в Польщы жыє з неполносправністю смыслу зріня. Іх чысло – подібні як на світі – з ріжных причын росне, тіж демоґрафічных. Спричынят тото, што не лем міста, але і туристичны пути, тіж в горах, достосовуваны сут до потреб такых осіб.

В остатніх трьох роках в підкарпатскым воєвідстві, при спілпрацы з Бєщадском Ґрупом Гірской Охотничой Ратунковой Медичной Помочы вытычыли і удоступнили три пути перезначены для осіб з неполносправністю зріня.

Кєд дахто жыє в великым місті, може мати вражыня, што в квестиі достосовуваня доступности для осіб з неполносправністями є уж дост добрі. Інакше справа выглядат в примірі туристичных пути, примірово в горах. Тых, котрыма безпечні могли бы ся переміщати сліпы або слабовидячы особы, є покля што барз мало.

Ольховец і Бєщады

В тій обшыри піонєрскы діяня веде підкарпатскє воєвідство. Три туристичны пути были запроєктуваны з ратівниками Бєщадской Ґрупы Гірской Охотничой Ратунковой Медичной Помочы і дозваляют особом з неполносправністю зріня вырушыти в Низкій Бескід або Бєщады.

Перша зо стежок то «Видіти Низкій Бескід – туристична стежка з авдийодескрипцийом». Має долгіст 4,5 км і зачынат ся в центрі села Ольховец. Сама траса є легка, а на пути находят ся м.ін. церков і памяткова лемківкска хыжа. Вчас прогулькы мож почути климат села, з красныма луками, загородами і паствисками.

Другій зо шляків то «Видіти Бєщады – туристична стежка з авдийодескрипцийом». То типово гірскій пут. Вытычыли го на пасмі Єленюватый над Мучным. Як раз в Мучным перед будинком Центра Промоциі Лісництва єст початок. Конец зас находит ся на видоковій вежы, з которой обзерати мож панораму Бєщадів. На вежы находит ся тыфлоґрафічна таблиця з розписаном панорамом найвысшых верхів.

Третя зо стежок – «Видіти Солину – туристична стежка з авдийодескрипцийом» іде на Пасмі Жукова над Нижніма Устриками і чыслит 9 км. Доступны сут там роверы-тандемы, котры можут схоснувати особы з неполносправністями разом з провідниками. Пожычыти мож іх в Центрі Школінь SOS na Ratunek в Рівным. Траса веде шутруваном дорогом і была вытычена тіж з думком о родинах з дітми ци о особах, котры переміщают ся на візках. На кінци трасы, так само як в примірі попередньой, находит ся видокова вежа.

Што важне – при тычыню участ брали тіж особы з неполносправністю зріня.

Як пристосували шлякы?

На каждым з выміненых пути находят ся тыфлоґрафічны таблиці, котры презентуют примірово панорамы з видоковой вежы, медведя ци плянер з написами в языку Брайля. Додатково на каждым шляку найдеме специяльны значникы – то высылачы, котры комунікуют ся в мобільным ґратьом через стандард Bluetooth. В сумі на трьох путях сут 44 такы значникы: 18 на стежці в Вільхівци, 15 на пути над Мучным і 11 на Пасмі Жукова. Як хоснувати значникы? Треба зосканувати код QR, завдякы котрому поберат ся аплікацию на телефон.

Значникы находят ся в місцях до одпочываня, атракцийных місцях, як нп. видоковы пункты ци в ключовых місцях на трасі, як нп. скрижуваня доріг. Передают они розмаіты інформациі – цікавинкы, леґенды, історичны факты звязаны з даным місцьом.

Дальщы пяны

Шлякы одданы підкарпатскым воєвідством стрітили ся з добрым принятьом, были імпульсом для інчых орґанізаций в державі до подібных ініциятив. Іщы того рока плянуют одкрыти черговый шляк на обшыри підкарпатского воєвідства – тот буде ся находил в саноцкым скансені.