Сумар дня на 20. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 20. серпня/авґуста 2024 р.

Жытелі Высочан не хотят повторного одкрытя каміньолому

В Высочанах в ґміні Команча жытелі простестуют проти повторному одкрытю каміньолому. Сусідство камінольому вязало ся з галасом, курявом і дырґанями повязаныма з веденыма роботами. В 2020 р. скінчыла ся концесия на выдобываня, а маршалок воєвідства рішыл початок рекультивациі обшыри. З той причыны війт ґміны Команча рішыл реновацию дорогы, котра не мала быти уж так інтенсивні хоснувана. Разом ґміна выдала 3 млн зл на ремонты доріг в цілым селі. Єднак того рока каміноьлом был зас взятый в аренду, новый властитель хоче ся старати о концесию на наступных 40 років. На єй основі каміньолом буде діял шіст днів в тыжни. Жытелям Высочан не подабат ся перспектива повторного одкрытя закладу, як арґументуют – протягом остатніх штырьох років в селі міцно розвинула ся туристика, котра впаде при діяню каміньолому. В звязку з выданьом ґміном Команча позитивного середовискового рішыня, мешканці Высочан одкликали ся до Саморядовой Апеляцийной Колегіі. Серед арґументів проти одкрытю каміньолому єст м.ін прожываня на тій обшыри підорлика малого.

Дни Деревяной Архітектуры 2024

В днях од 23. до 25. серпня/авґуста в цілій Польщы пройде святкуваня Днів Деревяной Архітектуры 2024. Подіі звязаны з промоцийом деревяной архітектуры в Малопольщы орґанізуваны будут в девятьох місцях, головны атракциі пройдут 23. серпня/авґуста в Каштели в Шымбарку. Там тіж охочы будут мочы взяти участ в етноґрафічно-моделярскых варштатах «Акция транслокация», де дознают ся, як колиси будували лемківскы села, як выглядала хыжа на селі і ци мож перенести хыжу зо собом. Додатково мож буде звиджати Скансен в Шымбарку, зреконструувану церков в Ґладышові ци грекокатолицку церков в Бортным. Ціліст проґраму дополнят «отворены двері» в обєктах Деревяной Архітектуры, так што каждый буде міг обізріти перлины Малопольщы. В дальшых днях акциі перенесут ся до загороды «Апольонія» в Закжові, церкви в Бінаровій ци костела в Оравці і Сандецкого Етноґрафічного Парку. Цілю подіі єст популяризация і промоция деревяной архітектуры. Вступ на кажду з атракций єст дармовый. Полный проґрам находит ся на сайті Нацийонального Інституту Культуры.

Єдиниця Охотничой Пожарничой Стражы з Высовой єст уж в Державным Системі Ратовничо-Гасничым

Єдиниця Охотничой Пожарничой Стражы з Высовой єст уж офіцийні влучена до Державного Систему Ратовничо-Гасничого. Офіцийне підписаня документів прошло 14. серпня/авґуста в Уряді Ґміны Устя Рускє. Серед присутных, окрем війта ґміны Евы Гарбовской-Ґура і коменданта Повітовой Державной Пожарничой Стражы в Ґорлицях Вальдемара Крока, были тіж представникы зарядів ОПС з Высовой і Ґладышова. Як підкрислил комендант, влучыня єдиниц ОПС до реґістру, то не лем великє выріжніня, але тіж зобовязаня. Єдиниці мусят сполняти высокы стандарды выпосажыня і вышколіня. Окрем дописаня ОПС з Высовой до систему, одраз підписано продолжыня на наступных 5 років приналежности ОПС Ґладышів.

«Спацер ентомолоґа» – остатні вакацийны варштаты в Маґурскым Нацийональным Парку

Маґурскій Нацийональный Парк просит діти і молодіж на остатню вакацийну стрічу з природом. В найблизшый четвер 22. серпня/авґуста пройдут тереновы варштаты «Спацер ентомолоґа». Подія направлена єст на діти в віку од 8 років разом з дорослыма опікунами. Варштаты будут ведены в часі прогулькы на вершок Высокє. Охочы прошены сут прити на місце збіркы о 10.00 год. коло лемківского цмонтеря в селі Жыдівскє. Участ в занятях єст дармова, але обовязуют скоршы записы. Реґулямін прогулькы разом з можливостю запису находит ся на фейсбуковым сайті Парку.