В любовняньскім сканзені мож видіти жывот русиньскых дротарів

До Музея народной архітектуры під градом Любовня перед часом прибыв новый обєкт, котрым є деревяна хыжа з Камюнкы. Як інформовала Даша Єленьова із Одділіня комунікації Пряшівского самосправного краю, в деревянім домі мож посмотрити на жывот дротарів, котрыма тото русиньске село прославило ся.

Хыжа з Камюнкы, котра была сприступнена навщівникам сканзену, є зрубовый дім, якый быв збудованый у 1934-ім році. Актуално в нім музей презентує експозіцію під назвов Дрітаре одходят.

Найновішый обєкт в сканзені в Старій Любовні належав іщі в 1930-ых роках дротарьови і ховательови быків Антонови Курцінови. Зато там была і наіншталована експозіція, котра розкрывать навщівникам жывот дротарів із Спіша.

З боку тіполоґії то єднотрактовый дім, котрого обытна і господарьска часть суть під єднов стріхов. Обытну часть творить ізба і сіні, до господарьской части належыть стайня, шопа і боїско.

В части передньой ізбы обєкту находить ся експозіція, котра зображує родинный обряд повязаный із одходом чоловіка. У вступных сінях на то надвязує уж експозіція дротарьства, і то в його традічній вандровній подобі заникнутого ремесла, яке было скапчане з одходом хлопів із бідной отцюзнины до заграніча.

Музей в тых днях одкрыв і постоянну експозіцію з назвов Лазориків фундуш, котра є наіншталована в ареалі камянно-деревяной господарьской будовы, в боїску з Руськой Волі, котре збудовав маїтель Юрій Борчак у 1945-ім році.