«Голосы Русинів Підкарпатя» – середа, 18.10 год.

На тот раз поведеме бісіду з молодым Карпаторусином, родаком із Марамороша – Петром Біровом. Петро ся родив у Хусті, але на днешній день бівше як половину жывота прожыв в Ужгороді.

Учів ся в Ужгородськім коледжі умень імени Адалберта Ерделія, а теперь є штудентом Факулты чуджой філології УжНУ.

Коли Петро перебрав ся із старшынов жыти до Ужгорода,  втогды ганьбив ся русиньской бісіды. Але під впливом файных цімборів поміняв свої погляды і перешов у комунікаціях на материньскый язык.

Петро – єден з тых представителів молодежи, котра перешла на русиньскый язык, дякуючі словникам і роботі з літературов. Зато його словна база доста інтересна, а бесіда не є натілько засмічена як у многых носителів русиньского языка, лексіка котрых найвеце припоминать „суржик“. Мож вповісти, што то єден з першых хоснователів літературного карпаторусиньского языка.

Окрім того, же Петро Біров робить сайт і ґрафічну обробку журнала «Отцюзнина», вєдно з цімборами він, хоснуючі компютеровы технолоґії, зробив много доброго про Карпаторусинів в просторі інтернету. Тым дав шансу нашій бісіді ступати в ногу з часом. Тому слухайме молодого русиньского поліґлота, айтішника Петра Бірова.

Слухайте «Голосы Русинів Підкарпатя» в середу 14-го авґуста 2024 р. о 18.10 год., або повторіня в четверь 15-го авґуста о 4.30 год. і в суботу 17-го авґуста 2023 р. о 11.00 год. за русиньскым часом.