Сумар дня на 12. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 12. серпня/авґуста 2024 р.

Православна Парохія в Мальчыцях потрібує фінансового спертя

Як поінформувала Православна Парохія Благовіщыня Пресвятой Богородиці в Мальчыцях на Нижнім Шлеску, в 2023 р. завдякы спілпрацы з Ґміном Мальчыці в рамках Урядового Проґраму Одбудовы Забытків парохія отримала 245 000 зл дофінансуваня на реализацию задачы пн. Ремонт Даху Православной Церкви в Мальчыцях. Дах остатній раз был ремонтуваный в 1994 р., а днес веде до нищіня будинку ззовни і внутрі. Пару років тому по сильных дощах был латаный самыма парохіянами. Дах і інчы деревяны елементы, в тым крікви, нищыт тіж корник. Зато по ремонті даху конечне буде выконаня фуміґациі (ґазуваня корника), што буде барз коштовне. Ремонт єст необхідный для дальшого фунґуваня святыні – забытку і архітектоничной перлины, яку запроєктувал Ганс Пельціґ. Ремонт даху зачне ся в вересни/септембрі тр., а завершыти ся мусит до квітня/апріля будучого рока. На жаль, урядове дофінансуваня не покрыват цілости коштів ремонту, т.є. 401 тис. злотых. Аж 156 тис. злотых мусит здобыти парохія як власны середкы. В серпни/авґусті тр. з благословліня Святого Собору Єпископів Польской Автокефальной Православной Церкви орґанізувана єст загальнометрополитарна колекта на потребы парохіі в Мальчыцях. Окрем того мож сперти парохію індивідуально, примірно через інтернетову колекту на сайті zrzutka.pl пн. Remont dachu cerkwi w Malczycach. Парохія в Мальчыцях то єдна з вельох парохій на чужыні, котру в більшости творят потомны выселеных в 1947 р. Лемків (головно з Баниці, ґміна Устя Рускє).

Громадяньскій Буджет Міста Ґорлиці 2024

Од двох тыжнів тырват дванадцета едиция Громадяньского Буджету Міста Ґорлиці. Свою ідею може зголосити каждый жытель Ґорлиц, котрый скінчыл або скінчыт в тым році 16 років. Подібні як в попередніх роках, до диспозициі жытелів єст 900 тис. злотых, завдякы котрым поведе ся зреализувати дакілько проєктів. Зголошувати задачы до реализациі в рамках Громадяньского Буджету Ґорлиці 2025 мож до 2. вересня/септембра тр. в Містным Уряді в Ґорлицях, особисто або выслати почтом. Внескы зложены по тым терміні будут неважны. Думкодавця мусит зобрати під своім проєктом што найменче 15 підписів. Так як влони зголосити мож заєдно загальномістну, як і осільову задачу. Вартіст той першой не може перекрочыти квоты 300 тис. злотых, а другой – 50 тис. злотых. Голосуваня потырват два тыжні, од 1. до 14. жолтня/октобра.

Стоваришыня Carpatica глядат волонтерів

Стоваришыня Carpatica, орнітолоґічный табір, якій неперерывно од 1998 р. досліджат міґруючы птахы в Західніх Карпатах, потрібує волонтерів. В рамках Акциі Carpatica Стоваришыня каждоро рока глядат волонтерів до обслугы тырваючого ок. 3 місяці бадавчого пункту в місцевости Розстайне в Низкым Бескіді. Як мож чытати в оголошыню, на орнітолоґічным таборі сут тереновы условія – спит ся в шатрах, неє біжучой воды, але єст гірска ріка і спокійна, тиха долина в серци Маґурского Нацийонального Парку. Стоваришыня оферує своім волонтерам участ в вельолітніх і вельоскальовых науковых баданях, орнітолоґічне і загальноприродниче знаня, як і знаня в обшыри сурвівалю, участ в діянях хосенных для природы і птахів, але і туній спосіб на цікавый урльоп в красным місци в оточыню дикой природы. Зголосити мож ся майльово або через інтернетовый формуляр доступный на фейсбуковым сайті подіі Akcja Carpatica 2024. Зарезервувати мож свобідный термін до 27. жолтня/октобра тр.