«Слово» – 7-ма неділя по Сошествії Святого Духа – неділя, 9.00 год.

Святый апостол Павел в Писмі ку Тімотейови пише, же ціле Святе Писмо є хосенне на научаня, потіху, напоминаня. То є ціле од Книгы Бытія аж по Зъявліня св. Йоана. А ціле Святе Писмо може назвати і словом: Ісус Хрістос.

Бо Старый Завіт приготовляв через передповіданя в Законі і пророках на приход Хріста. А Новый Завіт, котрый ся называть Євангеліє – то є радостна новина. Радостна новина о спасіню о захрані чоловіка. Бо на тото пришов Хрістос, жебы нам подав тоту радостну новину.

І днешнє слово нам говорить радостну новину. Кедь Ісус іде із дому Яіра, де воскресив його дівку, котра мала лем дванадцять років, а перед тым выздравив жену, хвору на кровотечіня, ішло за ним много народа. Тыж і двоми сліпы, котры голосно кричали і просили помилованя – то є выздравліня, провидіня. Ісус їм не одповідав, але ішов дале, і вошов до дому. Они хоць самы не могли іти, дали ся привести ку Ісусови. Він ся їх опросив: Ці вірите, же я тото можу зробити? А они одповіли: Віриме. Ісус ся дотулив їх очей і повів: Най буде так, як сьте увірили. А їх очі ся такой отворили.

Ісус їм не одповідать такой, жебы єднак выпробовати їх віру. Бо они чули о чудесных подіях з кровоточівов женов і дівков Яіра, і тото іщі веце розпальовало їх віру, же Хрістос і їм може помочі. А ту коли были так близко, Ісус не одповідав, але ішов аж до дому. Тым хотів выпробовати їх віру.

А тыж принести хосен і про нас. Бо ся їх звідує: Ці вірите, же я тото можу зробити? То значіть: Ці вірите, же мам тоту владу? Вірите, же я справды Божый Сын, владыка неба і землі, владыка над жывотом і смертьов, владыка над жывыма і мертвыма? Вірите, же я мам вшытко у своїх руках? Же нич ся не діє без мойого відома? Же і тогды, коли вам не одповідам такой, і тым хочу вам принести хосен вашым душам?

Так хотів выпробовати віру тых двох, але і нашу, коли ся стрічаме з тяжкостями, ці наша віра є надале теврдов, або ся легко заколысаме, коли діла не ідуть так, як то сі мы задумаме, або як сі думаме, же то є про нас хосенне.

Дале хотів указати, же тым, же не одповідать такой, давать простор на выявліня їх віры: Віриме. Так і мы, коли теперезливо переношаме різны тажкы сітуації, перебываме в довірі Хрістови, же і кедь не розумлю, але вірю, же тото є про мене на хосен. Наша віра може быти на хосен і про тых, котры уж бы ся ішли заколысати, стратити віру і ту видять наше свідчіня, котре їм поможе вытырвати твердыма і ся не заколысати.

Так най нам тото днешнє слово помагать. Жебы сьме справды в каждій сітуації нашого жывота повторяли з тыма сліпыма: Вірю, Господи. Слава Ісусу Хрісту!

В неділю, 11. авґуста 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. авґуста 2024 р. о 12.00 год. і 12. авґуста 2024 р. о 2.00 год. за русиньскым часом.