Сумар дня на 8. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 8. серпня/авґуста 2024 р.

Святкуваня 150. річниці Діонізия Няраді

5. серпня/авґуста одбыла ся в Новым Саді, в просторах Заводу про культуру войводиньскых Русинів, перша стріча Єпархіяльного комітету для святкувань 150. річниці од народжыня грекокатолицкого єпископа Діонізия Няраді. Вчас стрічы бесідувано о плянах прирыхтуваня Медженародной науковой симпозиі «Владыка Діонізий Няраді: жывот і діло», як і дальшых подій, котры сут повязаны з тым ювілейом. Плянувана симпозия мала бы проходити в другій половині листопада/новембра в Рускым Керестурі і Новым Саді з тым, же буде орґанізувана Єпархійом св. Миколая во спілпрацы з Ужгородскым Нацийональным Університетом і Заводом про культуру войводиньскых Русинів. О точній даті будут орґанізаторы іщы інформувати. Владыка Діонізий Няраді народил ся 10. жолтня/октобра 1874 р. в Рускым Керестурі, а вмер 14. квітня/апріля 1940.

Павел Ґамбаль презесом Ліґницкого Підприємства Водопроводів і Канализациі

Лемко, Павел Ґамбаль был выбраный новым презесом Ліґницкого Підприємства Водопроводів і Канализациі. Ґамбаль выграл конкурс, в котрым стартувало парох кандидатів. На тым становиску заступит Збіґєва Мроза. Дотля Павел Ґамбаль был презесом Польковицкого Центра Здравотных Услуг. Новый презес має 42 рокы. Є доктором – інжынєром, експертом заряджаня проєктами. Скінчыл Науково-Технічный Університет в Кракові. В роках 2007-2009 робил для ґрупы KGHM Польска Мідь. Од 2019 р. был звязаный з Польковицкым Центром Здравотных Услуг. На Учельни Яна Выжыковского в Любіні давал выклады з заряджаня. Был оціненый парома нагородами за його менеджерскы успіхы.

В Санковій буде другє рондо

В Санковій побудуют другє рондо. Буде лучыло доізды до ґмінного уряду, а тіж до спортового пляцу, ремізы і школы. Модернізация має на ціли поправу функцийональности і безпекы на тым одтинку дорогы. В самым центрі Санковы проходят зміны. Подля урядників найбільше з той части дорогы корыстают діти і іх родиче, котры ходят до школы і предшколя. Кошт цілой інвестициі то 4,5 млн зл, з чого 1,8 млн буде коштувала перебудова самого комунікацийного систему в центрі ґміны. Решта грошів буде передана на модернізацию дорогы Санкова – Сяры. В рамках інвестициі побудуют новы ходникы. На паркінґах дадут новый асфальт.

Одпуст на горі Звір в Літмановій

Много люди зышло ся вчас вікенду 3. і 4. серпня/авґуста на головным одпусті грекокатолицкой Церкви на горі Звір над селом Літманова в окресі Стара Любовня на Пряшівщыні. Проґрам головного одпусту в Літмановій зачал ся уж в суботу. В неділю проґрам розпочал ся евхаристичным благословліньом, по котрым наслідувал Параклис, недільна утреня, Акафист до Пресвятой Богородиці і ружанец з активном участю візийонарок. Завершыньом была торжественна архієрейска Божеска літургія, котру служыл Высокопреосвященый владыка Йона Максим, пряшівскій архієпископ і митрополита, за участи емеритуваного архієпископа Йоана Бабяка.