Сумар дня на 6. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 6. серпня/авґуста 2024 р.

Русины-грекокатоликы з Зъєднаных Штатах Америкы будут святкували 100 років еґзархату

В Зъєднаных Штатах Америкы Русины-грекокатоликы святкуют 100 років, одколи здобыли свою першу церковну структуру і выникнул еґзархат – попередник днешньой Пітсбуржской архієпархіі і Митрополитной церкви. В 1924 р. Апостольска Столиця покликала Пітсбуржскій апостольскый еґзархат про Русинів. Папа римскій Пій XI за першого еґзарху про Русинів в Зъєднаных Штатах Америкы вызначыл Василя Такача. Святкуваня столітя істнуваня пройдут 13. серпня/авґуста в Церкви Пречыстой Дівы Мариі в Ню Йорку. Подія розпочне ся од прелекциі, в рамках котрой отец Хрістофер Зуґґер – історик, буде бесідувал о жытю отця Такача по обнятю функциі еґзархы в новоодкрытым еґзархаті. Пак буде служеный Дяковный молебен, котрый одправлял буде владыка Курт Бурнетт, єпарха в Пассаіку, вєдно з домашніма священниками.

Мож уж хоснувати басен в Высовій

Од 1. серпня/авґуста по пятьох роках нефунґуваня зас діє басен в Высовій. Єдна з головных атракций курорту перешла ґрунтовну реновацию, котрой цілю была поправа заєдно безпекы, як і комфорту хоснуваня. Припоминаме, што басен был закрытый од 2019 р. зо взгляду на недостаткы в конструкциі. Як і перед закрытьом, в середині находят ся ріжного рода атракциі, такы як масажеры, повітряны лежанкы ци стация водного масажу. Лишыл ся тіж басен для діти та сауна і бар. Одкрытя обєкту было догло ждане не лем через жытелів ґміны Устя Рускє, але тіж туристів. Додаткова інфраструктура находит ся тіж воколо басену, єст то пляц забав для діти разом з тирольком і лежаками. Ремонт курортовой атракциі коштувал ґміну Устя Рускє около 5,5 млн зл, з чого част вкрыло дофінансуваня з проґраму Польскій Лад.

Ґміна Крампна отримала позволіня на плошыня волків

До 31. мая 2029 р. в ґміні Крампна мож буде плошыти волкы, котры за близко підыйдут до ґаздівок, таку згоду выдала Реґіональна Дирекция Охороны Середовиска в Ряшові по выстосуваню писма через війт ґміны Катажыну Мацєйчык. Жытелі ґміны будут мочы одганяти волкы, кєд дакє звіря найде ся ближе як 150 м од забудувань ци годовляных звірят. Можут схоснувати до того піротехнічны материялы, гуковы пістолеты ци колаткы о окрисленій мочы. Што барз важне, волків дале не мож ранити, зас факт плошыня треба потім зголосити в уряді ґміны. Близкіст Маґурского Нацийонального Парку спричынят, што волкы часто приходят в околиці сел, де атакуют домашні звірята. В 2023 р. до Дирекциі в Ряшові вплынуло понад 140 зголошынь про шкоды спричынены волками, о приближеній квоті 360 тис. зл. За рахунковыма даныма в Парку находит ся коло 20 особників в трьох ватахах. Вартат тіж припомнути, што волкы находят ся на червеній листі ґатунків загороженых в Польщы і на червеній листі загороженых ґатунків в Карпатах.

«Крутят ня Яслиска»

Уж в наступный вікенд, од 16. до 18. серпня/авґуста в Яслисках пройде 3 едиция фестівалю «Крутят ня Яслиска». В проґрамі подіі не лем єст презентация фільмів в пленеровым кіні, але тіж стрічы з творцями, концерты, выставы, кастінґы, варштаты, нічне кіно ци бесіды «під каштаном». Участникы будут мочы обізріти польскы фільмовы продукциі і взяти участ в дискусиях. В рамках варштатів ведены будут зілярскы спацеры і наука печыня прозяків. Орґанізаторы зрыхтували тіж атракциі для наймолодшых участників. Фестіваль розпочне ся в пятницю 16. серпня/авґуста о 11.00 год. од прелекциі фільму «Червены макы». Полный плян подіі найдете на сайті фестівалю.