«Бесіда» зас ся друкує

Перед 44. Лемківском Ватром на Чужыні явил ся дальшый номер часопису Стоваришыня Лемків – «Бесіда». То ч. 4 (199) за місяці липец/серпен 2024 р. «Бесіда» явила ся зас друком, кєд же попередні три номеры, за перше піл текучого рока, не были дотля дотуваны Міністерством Внутрішніх Справ і Адміністрациі (МВСіА).

В посліднім номері прочытаме м.ін. статі:

• Петро Трохановскій, Гарасимович в Никыфора;
• Моніка Тылявска, Перша вакацийна прогулька учеників лемківского языка; 
• Наталия Малецка-Новак, Стріча з меншынами в Нижньошлезскым Воєвідскым Уряді;
• Петро Трохановскій, Посвячено Пропамятный Крест в Ясюнці; 
• Януш Квока, Сонце поясніло над Ясюнком;
• Севериян Косовскій, Істория воєнной вандрівкы Кірила Бреяна;
• Jan Pisuliński, Akcja “Wisła” i jej fałszywy obraz; 
• Петро Медвідь, Kasigarda є місце, де мож дотулити ся і «нашой» Америкы. 

Окрем того, в часописі мож прочытати выступліня ведучой Стоваришыня «Руска Бурса» в Ґорлицях Наталиі Малецкой-Новак, якє выголосила 24. мая 2024 р. в Рускій Бурсі на привитаня присутных з нагоды выкладу проф. Яна Пісуліньского посвяченого ремісиі слідства вс. Акциі «Вісла».

До того не бракує примірів давной і сучасной русиньской творчости. Можеме чытати продолжыня – 3. част оповіданя Симеона Пыжа під наголовком «Ґорлицкій Бурсак». Дальше є оповіданя – тіж 3. част – авторства Великосхымника Ананія (Русиняка) під назвом «Мы ся іщы вернеме».

Зас на нашых поличках

Початком текучого рока інформували сме о тым, што МВСіА одмовило фінансуваня найстаршому лемківскому часописови по 1989 р. – «Бесіда».

По посланю писма Стоваришышыньом Лемків, а фінальні розписаню через МВСіА додаткового набору внесків на діяльніст меншыновых орґанізаций, Стоваришыня Лемків отримало позитивне рішыня о признаню фінансуваня на выдаваня часопису в 2024 р. Рішыня в тій справі явило ся в другій половині рока.

Попри тым, орґанізация хоче выдрукувати три залеглы номеры, якы за січен/лютый (ч. 196), марец/квітен (ч. 197) і май/червец (ч. 198) явили ся лем в електронічній версиі. Електронічну версию трьох попередніх номерів за 2024 р. можете придбати в інтернетовым склепі Стоваришыня Лемків.

Кєд попередні номеры будут выдрукуваны, певністю так само будут доступны до придбаня.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.