Сумар дня на 5. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 5. серпня/авґуста 2024 р.

Одбыла ся 44. Лемківска Ватра на Чужыні

В минулый вікенд проходила в Михалові на Нижнім Шлеску 44. Лемківска Ватра на Чужыні, якой орґанізатором єст Стоваришыня Лемків. З причыны планной, дощовой хвилі в пятницю ватряный проґрам мусіл быти дакус зміненый. Офіцийне одкрытя было перенесене на суботу, а вшыткы пятницьовы концерты одбыли ся на сцені поблизкой стодолы. Одкрытя проґраму Ватры одбыло ся в суботу о 16.00 год. Выступил Репрезентацийный Ансамбль Пісні і Танця Стоваришыня Лемків Ластівочка з Пшемкова. Пак делеґаты зложыли квітя під памятником Акциі Вісла. Чест жертвам Акциі Вісла оддали і представникы власти, м.ін. віцемаршалок Ярослав Рабченко, президент Ліґниці Мацєй Купай, війт ґміны Любін Тадеуш Кєлян і другы. Кульмінацийным моментом было очывидні розпаліня ватры. В тым році почестна функция положыня огня припала трьом Фльоринчанам – теперішнім і бывшым жытелям Михалова: Іванови Дзядикови, Михалови Канючкови і Осифови Лучківцьови. Пак продолжали концерты, уж на пленеровій сцені на ватряным поли. Специяльныма гістми были в тым році два ансамблі з Пряшівской Руси, Полонина і Стужыця, якы презентували автентичный русиньскій фольклор з Уличской Долины. Ансамблі в рамках свого выступліня вказали і обряд русиньского весіля. Окрем того од полудня проходили того дня конкурсы, спортовы змаганя, прелекциі і інчы акциі. Фотореляциі з 44. Лемківской Ватры можете обзерати на фейсбуковым сайті Ватра Михалів.

Важны дороговы інвестициі на Підкарпатю і в Малопольщы

Тырвают інтенсивны будовляны працы на новым одтинку S19, котрый получыт автостраду A4 і Ряшів з граничным переходом зо Словацийом. В рамках трасы побудуваный буде понад 2-кілометровый тунель і естакада на высокости 80 метрів, найвысша в Польщы. Будовляны працы мают ся завершыти найпізнійше в січни/януарі 2028 р. Товды жытелі коросняньского повіту будут мочы експресово доіхати до столиці воєвідства, як і до границі зо Словацийом. Новы дорогы будуют не лем на Підкарпатю. Розбудова важных доріг тырват і в Малопольщы. Штораз ближе кінця єст будова обводниці Бжеска, котра єст єдночасно вступом до будовы Сандеччанкы – новой дорогы, котра получыт Новый Санч з автострадом. Інвестиция была інвестицийным конкурентом інчой дорочы – маючой получыти Кєльці, Тарнів, Ґорлиці і Ясло. Тота концепция на жаль практично впала. Плянуваный термін одданя Сандеччанкы то 2027 р.

Лемківскій акцент на одкрытю Реґіональной Ізбы Памяти в Сухій Ґурній

В пятницю 9. серпня/авґуста в Сухій Ґурній в ґміні Польковиці пройде торжественне одкрытя Реґіональной Ізбы Памяти. Ізба находит ся в одремонтуваным ґміном, бароковым Палаци в Сухій Ґурній. Заряджат ним Центр Культуры в Польковицях. В Реґіональній Ізбі Памяти будут презентуваны памяткы, артефакты, фотоґрафіі та істориі, якы повело ся зобрати в остатніх тыжнях і місяцях од жытелів реґіону. Місце має быти простором, в котрым будут мочы одкрывати і передавати свою історию, свойого походжыня і коріня. Офіцийне одкрытя Ізбы пройде о 17.00 в Видовисковій Сали Палацу. Головным пунктом проґраму буде концерт Лемківского Ансамблю Пісні і Танця Ластівочка. Пак буде мож м.ін. звидіти Ізбу з провідником.