«Слово» – 6-та неділя по Сошествії Святого Духа – неділя, 9.00 год.

В Євангелію од Йоана чітаме Ісосвы слова: Тото говорю, жебы сьте были спасены. А св. Василій припоминать: Коли чуєш його слово або діло, не слухай недбало, але ідь на глубину. Так і днешнє слово на подавать спасителне посолство.

Ісус Хрістос пришов до Капернаума. Коли находив ся в домі і учів, зышло ся велике множество народа, же не было місця ани при дверях. Тогды четевро людей несли невладного а як не могли прийти ку Ісусови, вышли на стріху, пробили діру до повалы, а спустили го прямо перед Ісуса. А Ісус, як видів їх віру, повів не владному: довіряй, дітино, одпущають ся тобі гріхы.

Тоты слова зачудовали і тых, што принесли і фарізейів і учітелів закона, котры пришли лем зато, жебы поїмати Його на словах. Віра тых, што го принесли, была в тім, же вірили, же Ісус го може выздравити. А коли находять перешкоджіня дістати ся днука, не заколисали ся у вірі, але выходять на стріху а спустили го через повалу.

А ту нараз одповідь Ісуса на їх віру: Одпущають ся тобі гріхы. Могли подумати: тадь мы го принесли, жебы го выздравив, а він говорить о одпусщіню гріхів. Подобно реаґовали і фарізеї і учітелі закона: тадь Він зневажать Бога, хто може одпущати гріхы, окрім самого Бога? Ісус, так як видів віру тых людей іщі тогды, як выходили із дому з тым невладным, так видів і сердця тых фарізеїв і учітелів закона.

Говорить їм: Чом так злобно роздумуєте у своїх сердцях? Што є легше повісти: одпущають ся тобі гріхы або встань і ходь. А потім Ісус додав: жебы вы знали, же Сын чоловіка мать владу одпущати гріхы, говорить невладному: встань, возьмий свою постіль а ідь. А тот хворый такой встав, взяв постіл а перед вшыткыма одышов. Так нам тото слово говорить: Ісус є сердцевідець, котрый видить до сердця каждого чоловіка. Перед Ним нич не є скрыте: Кажда думака, кажда фантазія, кажде прягнутя сердця суть перед Ним одкрыты. А друге посолство днешнього Євангелія є, же Ісус тым, же наперед повів, одпущають ся ті гріхы, подав здравя, тому невладному, але наперед выздравив паралізу його душы.

Коли была выздравлена душа, аж потім выздравлять тіло. Жебы так указати, же дбаня о душу мать быти про нас на першім місці, бо якый хосен є зо здравля тіла, коли душа є паралізована гріхом? Слава Ісусу Хрісту!

В неділю, 4. авґуста 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. авґуста 2024 р. о 12.00 год. і 5. авґуста 2024 р. о 2.00 год. за русиньскым часом.