«Підкарпатска Іконосфера» – едиция 2024. Головна нагорода то 6 000 зл

Підкарпатскє Воєвідство просит фотоґрафів до участи в третій едициі загальнопольского фотоґрафічного конкурсу «Підкарпатска Іконосфера». Того рока темом знимок має быти «локальніст». Фотоґрафіі мож присылати до 18. жолтня/октобра тр. Пуля нагорід то аж 15 тис. зл.

Цілю конкурсу є популяризация вартістной фотоґрафіі, для котрой інспірацийом є культурный краєвид підкарпатского воєвідства, промоция самого воєвідства, але тіж можніст нагородити найліпшых твроців, котры в своій роботі хоснуют фотоґрафію. Воєвідтво хоче вказати свою обшыр через артистичны діяня, котрыма є і фотоґрафія.
Необхідным вымогом участи в конкурсі є, жебы конкурсова знимка была зроблена на обшыри підкарпатского воєвідства.

Конкурсовом темом єст локальніст – термін, што односит ся до невеликого простору. Локальніст обявлят ся в ріжных культуровых контекстах в тым просторі і в заходячых гын соспільных реляциях. Локальніст є так само ідентифікувана як важный елемент, котрый формує зріжницюваня реґіону.

Через тото орґанізаторы звертают увагу на культуротворчу ролю локального простору, котрый є місцьом выховуваня, дозріваня і социялизациі чловека. В локальности закріплює він свою ідентичніст і познає культуровы явиска, котры конфронтує в інчых вымірах.

Што сфотоґрафувати?

Джерела інспірациі можут тыкати:

• простору – дистрикты, подвірця, пляцы забав, загорідкы і повязаны з нима інчы темы, такы як екстериторияльніст, городжыня ся ци спільны просторы;
• комунікациі – темы звязаны з переміщаньом ся в локальным вымірі;
• економіі – локальны услугы, продукты, маркы;
• соспільных явиск – сусідскы реляциі, близкіст, спільнотовіст, меджепоколіньовы реляциі, солідарніст, почутя приналежности або выключыня;
• вартости – локальный патріотизм, «мала вітчызна», локальна істория;
• локальности о універсальній приметі, стыку локального з ґлобальным.

Знимкы мож присылати до 18. жолтня/октобра, оголошыня результатів пройде до 29. листопада/новембра 2024 р.

Головна нагорода то 6000 зл. Признаны будут тіж три выріжніня по 3000 зл. Підсумуваньом 3. едициі конкурсу буде поконкурсова выстава в Ґалериі Фотоґрафіі Міста Ряшова. Пізнійше выстава вказувана буде в інчых містах воєвідства.

Серед жырі конкурсу сут м.ін. Філіп Спрінґер – писменник і фотоґраф, та Михал Лучак – візуальный артиста, куратор, фотоґраф.