Слідом другых лемківскых сел пішли і потомны Вафчан, выгнаны з рідной землі в 1947 р. Подія повязаня з посвячыньом Пропамятного Креста, якій станул на давным нашым цмонтери в Вафці, одбыла ся 18. липця/юлия 2024 р.
Як кажда того рода подія, што присячена є памяти о минулым нашых предків, засвідчыла она о тым, што хоц днес в Вафці ніт руского населіня, не забываме на свій рід і де наша Отчызна.
Хотіли сохранити памят
Ініциятива окдытя місця памяти вышла од потомных Вафчан, якы остали выселены в рамках акциі Вісла. В тым ціли кінцьом 2023 р. были збераны кошты на посвтавліня креста. «В наслідстві акциі «Вісла» гробы были лишены без опікы. З роками деревяны кресты розлетіли ся, а сам цмонтір заріс. Єднако памят о похороненых там людях перетырвала. Уважаме, што заслугуют они на упамятніня. Як раз гын хотіли бы сме поставити памятник – символичный гріб згідный з іх віром і традицийом», писало ся в аносні збіркы.
Крест, якій посвячено того літа станул на давным лемківскым цмонтери, на котрым до выгнаня хоронено Вафчан. Богослужыня очелил владыка Аркадий (Трохановскій), єпископ ольшытыньско-ґданьскій грекокатолицкой Церкви в Польщы, якого рід по матери выходит як раз і того невеликого села на західній Лемковині. Участ в посвячыню Пропамятного Креста взял тіж о. Петро Качмар, парох грекокатолицкых парохій в Лоси, Новици, Прислопі і Панкній.
В спільній молитві за лемківскых жытелів Вафкы взял участ вікарий теперішньой римокатолицкой парохіі во Фльорицні, о. Мариюш Вжесіньскій (будівля бывшой православной церкви в Вафці днес приналежыт як дочырня святына до римокатолицкой парохіі во Фльоринці, де послугу несут священникы католицкого згромаджыня Серцанів). Окрем священників участ взяли і представникы локальных власти.
В часі богослужыня спомнено на памят вшыткых похороненых на місвевых цмонтери, але самособом і на вшыткы жертвы депортацийной акциі Вісла.
Послідували другы нашы села
Памятник є типовый для лемківского сепульклярного кумшту – трираменный камінный крест на постументі, на котрым буде інскрипция в двох языках – по лемківскы і по польскы. Додатково з доступныx плянів видно, што окремы інскрипциі будут по церковнославяньскы. Лемківска інскрипция є такого змісту: «Сам, Господи, упокой душы усопшых раб Твоіх в місци світлым, в місци квітуючым, в місци мирным, одкале втекла болізн, печаль і зітханя. Памяти передвоєнных мешканців села Вафка похованых ту».
Вафчане пішли путьом подібным до інчых селян. Перед роками подібны пропамятны кресты выселены і іх потомны поставили м.ін. в Боґушы, Білцаревій, Фльоринці, Ізбах, Ставишы, Перунці. Недавно подібна подія одбыла ся в Ясюнці, де крест посвчяно памяти бывшых жытелів трьох сусідніх сел: Ясюнкы, Кривой і Баниці.
Вычыслены місцевости то села, де ніт уж в більшости автохтонного лемківского населіня (остали лем поєдны родины і то не в каждым з тых сел).
фот. Петро Басалыґа