Сумар дня на 22. липця/юлия 2024 р.

Приносиме вам сумар медияльной ґрупы ЛЕМ.фм+ на ден 22. липця/юлия 2024 р.

«UjŚCIE KULTURY -Театр і горы»

В тым тыжни, в пятницю 26. липця/юлия в Ждыни рушат фестіваль з назвом «UjŚCIE KULTURY -Театр і горы». Як подают орґанізаторы, меджепоколіньова театральна ґрупа Племя і Стоваришыня ім. Мирка Нагача «Білый Сокій», то штырьодньове оповіданя о Низкым Бескіді – в тій лемківскій краіні повстала ґрупа Племя, котра кормит обзераючых образами, істориями одтале. До участи в подіі запрошены были і писателі, артисты звязаны з реґіоном. На пятницю заплянуване єст одкрытя фестівалю, концерт «Лемко Jazz», вечеря зрыхтуваня Кружками Сельскых Ґаздынь і спектакль на основі книжкы «Бомбель» лемківского писателя Мирослава Нагача. В суботу буде мож обзерати спектаклі «Бескід без кіту» на основі книжкы Мариі Стшелецкой і «Бескідскы Дзяды», взяти участ в авторскых стрічах і варштатах (м.ін. карпатскых пісен), піти на прогульку з провідником на Ротунду, ци выслухати концерту «Серенчы». Спектаклі, авторскы стрічы і варштаты будут і в неділю, а окрем того в проґрамі на тот ден єст і концерт лемківской пісняркы Юлиі Дошны. В послідній ден фестівалю Юлия Дошна буде вела варштаты карпатскых пісен. А окрем того буде мож м.ін. взяти участ в біциґльовій прогульці Радоцина, і іщы раз буде запрезентуваный спектакль «Бомбель/Нагач». Полный проґрам найдете на фейсбуковым сайті меджепоколіньовой театральной ґрупы Племя.

«Од Русаль до Яна» в Зындрановій

Уж в найблизшый вікенд, 27. і 28. липця/юлия в Зындрановій пройде традицийна подія орґанізувана Музейом Лемківской Культуры – «Од Русаль до Яна». В рамках суботнього проґраму одбудут ся: звиджаня музею, пропаґуваня книжок, прелекциі і доповіди та положыня квітя, а на 18.00 год. заплянуваны сут выступы ансамблів: Терещакы, Гудакы і гудобна ґрупа Медияль. Пак буде паліня огниска. В неділю по службі в церкви св. Миколая в Зындрановій одбуде ся офіцийне одкрытя свята з привитаньом гости. Пак запрезентуют ся: капеля Дукляне, ансамблі Ленчане, Бака, Карпатія, Свидничанка, Гудакы, Ославяне і Пековці. Окрем того буде і авторска стріча з авторком ”Лемківской кухні з Ріпок”, показы ремесла і конкурсы.

«Дукля. Оправданя присутности»

Од суботы 27. липця/юлия в Історичным Палаци в Дукли мож буде обзерати выставу образів Уршулі Лойко-Смоґожевской пн. «Дукля. Оправданя присутности». Куратором выставы є др Мирослав Рымар. Уршуля Лойко-Смоґожевска то артистка малярка, Варшавянка, абсольвентка Выділу Малярства Академіі Красных Штук в Варшаві. Інспірациі для творчой роботы находит в природничым і культуровым краєвиді Карпат. Робит в техніці олійного і енкаустичного малярства на полотні, батіку на гадвабі і дереві та в техніці керамічного образу. В Дукли малярству товаришыти будут поетицкы тексты. Більше про творчіст Уршулі Лойко-Смоґожевской і єй найновшу выставу прочытате в дописі на нашым портали.

Крениця як осередок олимпійскых рыхтувань

Як інформувал бургомайстер Крениці Пьотр Рыба, в минулым тыжни брал участ в выіздовым засіданю Сенацкой Комісиі Спорту, де представил можливости створіня в Креници осередка олимпійскых рыхтувань. Єст то стисло повязане з будовом штучно мороженого санечково-бобслейово-скелетонового тору на горі Івонка. Через наступны місяці буде схваленый місцевый плян просторного заґаздуваня, котрый буде основом до выконаня будовляного проєкту і отриманя позволіня на будову штучно мороженого тору.