Выстава Богдана Дудича – понедільок, 10.30 год. та 20.30 год.

Понад двадцет різбленых ікон і крестів авторства Богдана Дудича з Білянкы мож обзерати в Ґалериі Білянка 73. Вернісаж выставы прошол 18. липця/юлия 2024 р. Просиме слухати ретрансмісию той подіі уж заран, в понедільок 22. липця/юлия о год. 10.30 та 20.30. Выстава презентувана буде в Білянці до кінця серпня/авґуста тр.

Вернісаж одбыл ся при чысленні зобраній публиці, серед присутных была найблизша родина бл. Богдана Дудича, його приятелі, знаємы, а были і представникы локальных самоурядовых власти. Вельо з них забрало голос при одкрываню выставы. Бесідували о кумшті різбяря, його таланті. Споминали його приметы характеру, камаратство з інчым лемківскым різбярьом, його іменником – Богданом Карелом, якій недавно долучыл до вічной дорогы Білянчана. Вельократно вызвучали слова, што «тепер уж певністю різблят разом вымрияный іконостас…».

Богдан Дудич (16.06.1968-25.09.2019) – жыл і різбил в Білянці. Основну школу скінчыл в Лоси, середню – в Ґорлицях. По професиі был слюсарьом-спавачом, але вшыткы знали го як выдатного народного артисту, якій з кавальця липы творил святы образы.

Пласкорізбом зацікавил ся вчас войсковой службы – заінтересували го ґуральскы паличкы, котры стругал колеґа з кошар. Різбил ночами, головні іконы Богородиці, але тіж Розпятя Ісуса Христа, Тайну Вечерю, тіж інчых святых. Брал участ в конкурсах і пленерах для непрофесийных творців. Был лавреатом артистичной нагороды ім. А. Длуґоша признаваной бургомайстром Ґорлиц.

Ікона св. Миколая авторства Білянчана трафила в 1997 році в рукы папы Йоана Павла ІІ вчас візиты в Фундациі св. Владимірa Хрестителя Кыівскоі Руси в Кракові.

Різбы Богдана Дудича находят ся в приватных колекциях по цілым світі. Мал іх зробити коло тисяча…

Премєра ретрансмісиі реляциі з верснісажу выставы робіт Богдана Дудича в понедільок 22. липця/юлия 2024 р. о год. 10.30 і 20.30.