«Гіст в ЛЕМ.фм: Моніка Бабуля» – четвер, 10.30 год. та 20.30 год.

Невеликой постуры, але засягы могучы. Пришла в горы і одродила театральны традициі лемківскых сел. Моніка Бабуля на сцені мінит ся як камелеон, але нас вчас спільной бесіді зачарувала лагідным голосом і емоциями, котры має в собі і котры передає дале. Послухайте бесіды з артистком уж в найблизшый четвер 18. липця/юлия 2024 р., о годині 10.30 або о 20.30.

Моніка Бабуля основала парудесятособову Меджепоколіньову Театральну Ґрупу Племя, з котром вказуют спекталі, якы посередньо і безпосередньо оповідают тіж нашу історию. Спекталі, роблены на місци місцево-(не)місцевыма, вказували уж вельократно в Лоси, Высовій, Ждыни. Были тіж з нима в Кракові, Варшаві, над морьом… Всядиль при десятках, сотках осіб на публиці.

Коли оповіла-м Моніці о театральных ґрупах, котры іщы кінцьом ХІХ і на початку ХХ ст. діяли праві во вшыткых лемківскых селах, а уж обовязково там, де были чытальні, то была барз приємні заскочена і дало єй то вельо радости.

Наштоден є заєдно артистком, як і директорком Ґмінного Осередка Культуры в Устю Рускым, а тепер і спілорґанізаторком Фестівалю UjŚCIE KULTURY. Teatr i góry, якій онедолга пройде в Ждыни в днях 26.-29. липця/юлия 2024 р. През штырі дни проходити будут показы спектаклів, концерты, варштаты карпатского співу, промоция літературы – авторскы стрічы, аж і премєра пілотажового одтинка сериялю Gmina Grzeszne.

О пєсах, о фестівалю, але і о емоциях жытя і бытя в Низкым Бескіді буде наша бесіда. Просиме слухати!

Фот. Beskid Bliski, Natalia Pacana-Roman i Teodor Włosek

Премєра «Гіст в ЛЕМ.фм: Моніка Бабуля» в четвер 18. липця/юлия 2024 р. о год. 10.30 і 20.30, повторіня: 23. (віторок) і 24 (середа) липця/юлия 2024 р. о год. 10.30 і 20.30.