Сумар дня на 17. липця/юлия 2024 р.

Приносиме вам сумар медияльной ґрупы ЛЕМ.фм+ на ден 17. липця/юлия 2024 р.

На св. Горі Явір посвятили угольный камін під будову православной церкви

12. липця/юлия на св. Горі Явір прошли богослужыня звязаны з торжеством свв. Петра і Павла. Божеску літургію очолювало двох православных архієрархів: владыка Авель, Архієпископ Люблиньскій і Холмскій та владыка Паісий, Архієпископ Перемышльскій і Ґорлицкій, при присутности парудесятьох священників аж зо штырьох єпархій: перемышльско-ґорлицкой, варшавско-бєльской, вроцлавско-щеціньской, люблиньско-холмской. Были і духовны зо Словациі та чысленні зобраны вірны з цілой Польщы. Тогорічне торжество на св. Горі Явір было о тілько важне, што по літургіі дошло до історичного моменту – владыка Паісий посвятил угольный камін під будову православной церкви. До фундаментів новой святыні был зложеный угольный камін з мощами св. Вифлеємскых Мучеників і св. Максима Сандовича. В цілый проєкт новой церкви на св. Горі Явір заанґажуваны сут лемківскы фаховці, в особах: Петро Криницкій з женом Івоном Іскром-Криницком – архітекты, Андрий Мерена – конструктор, Ірена Квока – авторка проєкту електричных інсталяций. Візуализациі нового обєкту зробил Давід Льорчык, студент архітектуры. Церков на св. Горі Явір буде мала компактну просту форму, вкрыту двоспадистым дахом, з шырокым окапом над обходом довкола муруваной церкви. Дах буде звінченый в центральній части голмом з привидном літарньом і маковичком, з двома псевдолітарнями по боках, звінченыма крестами.

Фестівалі Русиньской Культуры

O пілтора тыжня в Зындрановій пройде традицийна подія орґанізувана Музейом Лемківской Культуры – «Од Русаль до Яна». Буде то дводньова імпреза з концертами, промоцийом книжок, конкурсами і показами ремесла. В суботу запрезентуют ся Терещакы, Гудакы і ансамбль Медияль, а в неділю: капеля Дукляне, ансамблі Ленчане (Łęczanie), Бака, Карпатія, Свидничанка, Гудакы, Ославяне і Пековці. А уж в найблизшый вікенд, од 19. до 21. липця/юлия в селі Улич на Пряшівскій Руси, при самій украіньскій граници, одбуде ся 55. Фестіваль Русиньской Культуры. На пятницю орґанізаторы заплянували м.ін. презентацию документального фільму «Полонины – еха минулости Карпат», котрого режысерком є Домініка Новотна, вокалистка та докторантка в Інституті Русиньского Языка і Культуры на Пряшівскым Університеті, орґанізаторка фестіалю. Суботній проґрам то выступы дітячых ансамблів, пак знаных колективів як Русиньскє Тріо, Шамбрінці ци Полонина, а звіздом вечера буде Штефан Штец. Вчас фестівалю буде мож тіж обізрити выставу фотоґрафій, выслухати дискусийны панелі ци познати традицийны ремесла.

Ци поведе ся основати музей в Чарній Воді?

Аґнєшка Стопка, жытелька Шляхтівской Руси, не устає в пробах ратуваня традицийной хыжы в Чорній Воді і зорґанізуваня гын малого музею культуры і істориі Шляхтівскых Русинів. Як індивідуальна соспільничка зберат грошы через сайт zrzutka.pl на ремонт реченой хыжкы. Будинок єст в планным технічным стані і потрібны сут скоры ратунковы роботы. Є то бодай не найчастійше фотоґрафуване місце в Чорній Воді і околици. Кєд мате охоту помочы – на сайті zrzutka.pl впиште: «Renowacja starej chyży w Czarnej Wodzie – wzmocnienie podmurówki», є то як раз речена колекта Аґнєшкы Стопкы.

Кому стипендию ім. І. Русенка?

Товариство для Розвитку Музею Лемківской Культуры оголосило рекрутацию кандидатів, котры можут старати ся о стипендию ім. Івана Русенка. Буде то уж третя едиция річной стипендиі для молодых, здібных студентів. Жебы старати ся о таку стипендию, треба быти тогорічным матуристом, найти ся на списку принятых на студиі єдной з публичных высшых шкіл – університетів, політехнік ітп. в Польщы, і сполнити пару додаковых вымогів. Стипендия выносит 10 тис зл. Комплет документів треба зложыти до 10. серпня/авґуста тр. Папері доступны сут до побраня на сайті zyndranowa.org.