В Ужгороді рукоположыли нового мукачовского єпарху

Понад 2000 віруючіх, представителі властей, діпломатічных місій, десяткы єпіскопів із цілого світа, множество священиків – тоты вшыткы зышли ся у віторок 16-го юла 2024-го року в Хрествоздвиженьскім ґрекокатолицькім катедралнім соборі в Ужгороді, жебы брати участь на великім торжестві Мукачовской ґрекокатолицькой єпархії.

В тот день, коли єпархія припоминать собі свято Чудотворной Іконы Мукачовской Пресвятой Богородіці, быв рукоположеный і інтронізованый на єпіскопскый столець новый мукачовскый єпарха – Преосвященый владыка Теодор Мацапула.

Папа римскый Франціск призначів владыку Теодора за мукачовского єпарху 8-го мая 2024-го року. Матірь Церьков про наслідників Ужгородьской унії, русиньской традіції, має од того дня нового правлячого єпіскопа.

Єрархы із цілого світа

Головным святительом владыкы Теодора быв Высокопреосвященый Володимір Війтишин, архієпіскоп і митрополіта івано-франківскый, котрый нового владыку рукоположыв і на діакона а священика.

Далшыма святителями были Высокопреосвященый Йона Максим, архієпіскоп і митрополіта пряшівскый, і Преосвященый Ніл Лущак, помічный мукачовскый єпіскоп, дотеперішній апостольскый адміністратор Мукачовской єпархії.

Окрім них зышли ся на торжестві єрархы із цілого світа. Участь взяв архієпіскоп Вісвалдас Кулбокас – апостольскый нунцій на Україні. На єпіскопску хіротонію пришли і єрархы Церьквей русиньской традіції. Із Словакії пришов кошыцькый єпарха – архієпіскоп Кіріл Василь, емерітный архієпіскоп і митрополіта пряшівскый кір Йоан Бабяк ці емерітный торонтьскый єпарха владыка Маріян Андрій Пацак.

З Мадярьска пришли вшыткы трьоми єрархы – Высокопреосвященый Філіп Кочіш, архієпіскоп і митрополіта гайдудороґскый, владыка Атаназ Орос, мішколцьскый єпарха, і владыка Авел Сочка, котрый є ніредьгазьскым єпархом і сам є родаком із Підкарпатя.

Участны были і представителі Піттсбурзькой русиньской митрополітной церькви, за котру пришов Высокопреосвященый Вілъям Скурла, піттсбурзьскый архієпіскоп і митрополіта, і владыка Роберт Піпта, пармскый єпарха. Далше меджі участныма мож было видіти наприклад і владыку Ґеорґія Джуджара, єпарху з Руського Керестура, і далшых.

На торжестві Мукачовской єпархії, котра є церьквов свого права, брав участь і голова Україньской ґрекокатолицькой церькви – Блаженішый Святослав Шевчук, верьховный архієпіскоп києво-галицькый і митрополіта київскый, як і далшы єпіскопи УҐКЦ з Україны, але і з Европы, Америкы і Австралії.

На єпіскопску хіротонію пришли і представителі іншых конфесій з Підкарпатя ці римокатолицькы єпіскопи на Україні.

Одзвучало веце языків

Торжественна архієрейска літурґія, почас котрой владыка Теодор прияв єпіскопску хіротонію і быв інтронізованый на столець правлячого єпіскопа, была на церьковнославяньскім языку.

Но почас літурґії одзвучали і далшы языкы, в котрых брали ся єктенії ці іншы части, наприклад україньскый, мадярьскый, словацькый ці анґліцькый. Як пізніше в приговорі повів Высокопреосвященый Філіп Кочіш, якраз церьковнославяньскый язык є єден із тых елементів, котрый нас, наслідників Ужгородьской унії, капчать, хоць бісідуєме днесь на різных языках.

Проповідь тримав на літурґії апостольскый нунцій на Україні, архієпіскоп Вісвалдас Кулбокас.

По літурґії з поздоровліньом ку новому мукачовскому єпіскопови приговорили ся апостольскый нунцій, Блаженішый Святослав Шевчук, Высокопреосвященый Йона Максим, Высокопреосвященый Вілъям Скурла, Высокопреосвященый Філіп Кочіш, єпіскоп Віталій Скомаровскый – голова Конференції римокатолицькых єпіскопів Україны, і на кінцю приговорив ся владыка Ніл Лущак, котрый майже штири рокы вів єпархію як адміністратор.

На самім кінцю торжества першый раз як мукачовскый єпарха приговорив ся участным і владыка Теодор Мацапула.