«Слово» – Праздник свв. апостолів Петра і Павла – неділя, 9.00 год.

Свята Церьков нам в тім місяці ставить приклад святых верьховных апостолів Петра і Павла. Так кутро посмотьме на даякы моменты із їх жывота, жебы сьме і мы із того набыли духовный хосен.

Апостол Петро походив із Ґалілеї, з Вітсаїды, быв рыбарьом. Не мав теолоґічны школы. Як каждый Жыд і Петро в суботу навщівляв сінаґоґу, три раз в році приходить до Єрусалима. Аж єдного дня ся його жывот змінив, а то коли Ісус пришов а наказав йому спустити сіті, ай коли він з далшыма цілу ніч ся без хосна намагали. Тогды Ісус кличе Петра за апостола.

І Петро щіро любив Хріста. Но в часі выпробованя, то є в часі терпіня Хріста, Петро одрік ся зо страху од Хріста. Но приношать горенькый плач, як знак покаяня. А по воксресіню Ісус потверджує Петрово покаяня, коли говорить женам: Ідьте повісти моїм братам і Петрови. А коли ся ісус звідує Петра три раз, а на третій вопрос: Любиш мене?, Не Петро выступив, але Ісус сходить ку людьскій слабости і приймать і тото вызнаня той людьской любви, котру є Петро способный дати. А наконець засвідчує мученицков смертьов, роспятый долов головов.

Апостол Павел походив із іншой катеґорії, народив ся як римскый граждан, выховльованый од маленька великым учітельом а нескіршым мучеником за Хріста Ґамаліїлом. Но Хріста не познав, прото Його пронаслідовав. Но Ісус ся йому появив перед Дамаском, а з пронаслідователя став ся великый проповідник Євангелія.

Хто зможе выраховати вшыткы намаганя, терпіня, пронаслідованя, котры зазнав за Хріста? А як сам говорить: Я про Хріста приготовленый перенести неєдну смерть. Про мене жыти є Хрістос, а умерти значіть здобытя. З Хрістом єм прибитый на крест, уж не я жыю, але у мі жыє Хрістос. А наконець умерать за Хріста мученицьков смертьов, стятый як римскый граждан, мечом.

Так тоты двоми верьховны апостолы, світила цілого світа нас учать – любви ку Богу, про котрого ся одрекли вшыткого на тій землі. Апостол Петро то признавать словами: Смоть, мы охабили вшытко а ішли за тобов. А Павел: Вшытко поважую за страту, вшытко є про мене як людьска непотребность в порівнаню з познаньом Хріста.

Тыж учать нас прикладу покаяня. Коли ідеме по Божій дорозі, а закопнеме, упадеме до гріха, посмотьме на приклад покаяня Петра. А коли сьме далеко од Бога, коли сі говориме, то не є про мене, мене родічі не вели ку вірі, не дали покрестити, мене уж Бог не прийме, посмотьме на Павла.

Най тот куртый екскурс до жывота тых двох великых апостолів принесе хосен і до нашого жывота. Слава Ісусу Хрісту!

В неділю, 14. юла 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. юла 2024 р. о 12.00 год. і 15. юла 2024 р. о 2.00 год. за русиньскым часом.