Вігорлатьскый музей одсвятковав 40 років сканзену. І тото літо в нім проходять творчі варштаты

Експозіція народной архітектуры і бываня Вігорлатьского музея в Гуменнім – сканзен, пририхтовав на неділю 7-го юла 2024-го року святочне пополідне з богатым проґрамом. Музей собі тов подійов припомянув 40-ту річніцю одкрытя сканзену.

Експозіцію по десятьрічнім будованю і здобываню музейных експонатів одкрыли в юлі 1984-го року. Сканзен, котрый є в середині міста, творить ареал із 15-ма обєктами, котры суть із зберной области Вігорлатьского музея – окресів Гуменне, Снина і Меджілабірці.

Сканзен, котрый каждый рік навщівить понад 6000 людей, і котрый належыть меджі меншы на Словакії, є богатый што до архітектурты і має скарбы русиньской архітектуры.

Домінантов є деревяный храм

Домінантов гуменьского сканзену є Деревяный храм святого Михаіла Архістратига, котрый быв збудованый у 1764-ім році, і до Гуменного быв перенесеный у 1974-ім році з Новоселіці, Сниньского окресу.

То характерістічный трипросторовый выходокарпатьскый тіп сакралной будовы із зрубовов конштрукційов. Тісячі навщівників каждый рік обдивлюють нелем то, як церьков вызерать, але головно зрештаврованый іконостас і оріґіналный престол, котрый є в бароковім штілі, з балдахіном, якый стоїть на штирьох стовпах окрашеных мотівами винограду.

Храм є збудованый із ялицьового дерева, і в Новоселіці стояв близко теперішнього цінтеря, на верьшку.

Будовы і з далшых русиньскых сел

Деревяна церьков не є єдиным експонатом, котрый походить із русиньского села. Навщівниці на штирьох гектарах фундушу можуть видіти і далшы будовы, котры были перенесены почас будованя сканзену до Гуменного з русинськых сел.

Спомянути мож наприклад господарьскый дім з Калной Розтокы в окресі Снина, дім з Вышынкова в окресі Меджілабірці, котрый має в коморі наіншталовану ділню колесаря з тіпічным інвентарьом, хыжу з Нехваль Полюнкы в окресі Снина ці сыпанець з Выравы, недалеко Меджілаборець.

Сканзен має і господарьскы обєкты як наприклад ковальску майстерню із Нехваль Полянкы ці млин з Вышньой Яблінкы, Гуменьского окресу. Вшыткы обєкты мають в інтерьєрі і тіпічный інвентарь, котрый є повязаный з даным обєктом і його хоснованьом в минулости.

В сканзені і тот рік творчі варштаты

В Експозіції народной архітектуры і бываня Вігорлатьского музея в Гуменнім і тот рік почас літа проходить проєкт Ожывлены ремесла. В рамках нього музей приготовив пять творчіх варштатів, на котрых можете приучіти ся тіпічным ремеслам із минулости.

Три юловы і два авґустовы дні будуть в сканзені належати гончарьству, робліню з вівчов вовнов, тканю, корытарьству і ковальству. Вшыткы творчі варштаты будуть проходити під веджіньом фаховців на дане ремесло.