Сумар дня на 5. липця/юлия 2024 р.

Приносиме вам сумар медияльной ґрупы ЛЕМ.фм+ на ден 5. липця/юлия 2024 р.

Мож уж обзерати Музей Вілямівской Культуры

В віторок 2. липця/юлия в Вілямовицях одкрыто Музей Вілямівской Культуры. Жытелі Вілямовиц од років старали ся о місце, де будут мочы вказати свою культуру, традициі, істирию та язык. Як припоминат ведуча нового музею Юстниа Маєрска-Шнайдер, Вілямівяне од 2015 рока старают ся о узнаня свого языка як реґіонального – на жаль без поводжыня. Інституция кладе особливый натиск на вілямівскій язык, котрый в часі ІІ світовой войны был заказаный, а його хоснуваня было каране. В Музею мож буде чути вілямівскій не лем на награных бесідах ци в співі, але тіж буде можливіст нажыво послухати кустошів ци самому навчытит ся бесідувати на єдных з заплянуваных варштатів. В найблизшый вікенд, 6. і 7. липця/юлия вшыткы прошены сут на одкрыты дни музею. Пройде вельо акций промуючых музей, м.ін. одкрытя постійной выставы «Вілямівяне і іх сусіде», з презентацийом понад 7 тис. експонатів роками збераных через Стоваришыня Вілямівяне ци языковы і зілярскы варштаты. Присутны будут тіж мочы взяти участ в конкурсах та видіти выступ Rеґіонального Anсамблю «Вілямовиці» разом з варштатами гуляня.

«Духова подорож в фотоґрафіі»

Шаришскій Музей просит на выставу «Духова подорож в фотоґрафіі» авторства двох фотоґрафів з Гуменного Осифа Ляуруского і Владиміра Вайса. Презентуваны творы то головні чорно-білы фотоґрафіі. Част Ляуруского презентує деревяны і камінны цервки з пряшівского реґіону, та церковны церемоніі, поломничества і свята вписаны в традициі східнього обраду. Працы Вайса вказуют архітектуру горы Афон, стары монастырі, памяткы і природу, а тіж моменты зо штоденного дня монахів. Выстава єст дополніньон выставы ікон, на котрій презентуваны сут особливы забытковы іконы з деревяных святынь пілнічно-східньой Словациі. Выставу мож обзерати до кінця жолтня/октобра тр.

Зілярскы варштаты в Карпатах

Карпатскій Народный Університет просит до участи в курсі хоснуваня дикороснучых рослин. Подія обнимат штырі вікендовы стрічы, разом то аж 60 годин варштатів. Стрічы складают ся з теоретичной і практичной части. Участникы дознают ся про рослины натуральні выступуючы в Карпатах і іх хоснуваня через жытелів тых земель, будут мати основ етноботанікы, дикой кухні ци терапіі зільом. В проґрамі варштатів находят ся спацеры на луку получены з науком розріжняня ґатунків рослин, працила сушыня і рыхтуваня зіля ци робліня напарів і выварів. Оплата за курс то 100 зл, в тым єст нічліг, ідло і убезпечыня. Чысло місц огранычене, а формуляр до зголошыня найдете на сайті Карпатского Народного Університету. Записати мож ся до 12. липця/юлия.

Желізницьове получыня Мушына-Попрад потртрібує більшого потягу

Не так давно інформували сме, што на торы вернуло желізницьове получыня Мушына-Попрад. Потяг каждого рока тішыт ся штораз то більшом популярністю. Часом охочых на переізд єст так дуже, што потяг не єст в силі вшыткых помістити. З той причыны Новосандецкє Стоваришня Любутелів Желізниці выступило до Малопольской Желізниці з внеском о удоступніня білшого потягу. Як передала представничка Маршалківского Уряду в Кракові, малопольска желізниця заняла ся тым проблемом і быти може неодолга комфорт подорожы на трасі Мушына-Попрад поправит ся.

фот. Ślązag