Рада єрархів засідала в Братіславі

В днях 1-го і 2-го юла 2024-го року на Єпархіалнім уряді в Братіславі проходило 36-те пленарне засіданя Рады єрархів, котрой членами суть ґрекокатолицькы єпіскопи із вшыткых трьох єпархій на Словакії. Інформовав о тім за Братіславску єпархію Стано Ґабор.

Засіданя скликав пряшівскый архієпіскоп і митрополіта Йона Максим, голова Ґрекокатолицькой церькви на Словакії, участны были і братіславскый єпарха владыка Петро Руснак, помічный єпіскоп Братіславской єпархії владыка Мілан Лах, котрый є секретарьом Рады єрархів, і кошыцькый єпарха – архієпіскоп Кіріл Василь.

Было то історічно першый раз, коли засіданя Рады єрархів проходило на теріторії Братіславской єпархії.

На початку засіданя навщівив апостольскый нунцій в Словацькій републіці  архієпіскоп Нікола Джірасолі, якый выразив радость, же Ґрекокатолицька церьков під веджіньом нового митрополіты успішно розвивать ся.

Владыкове занимали ся вецеро актуалныма темами. Обговорили недавну навщіву Ad limina apostolorum у Ватікані, в рамках котрой навщівили і Дікастерію про восточны церькви а стрітили ся з префектом дікастерії – кардіналом Клаудіом Ґуджеротті.

Темов была і формація будучіх священиків, літурґічны тексты, были зряджены і дві митрополітны комісії – економічна і катехтетічна. Єпіскопи занимали ся і актуалным станом процесу схвальованя партікуларного права, вопросом апостольского візітатора про ґрекокатоликів у Европі і приправов подій на Юбіленый рік 2025.

Найблизше засіданя Рады єрархів має одбыти ся в Бадині на початку новембра.