Русиньска Ватра кличе і Русинів з Лемковины

В днях од 12. до 14. липця/юлия проходила буде ХІІІ Русиньска Ватра в Малым Липнику на Пряшівщыні, котрой орґанізатороми сут молоды.Русины, Фольклорный Ансамбль Рутенія, село Малый Липник і Любовяньскій Освітній Центр.

Хоц то село Малый Липник територияльні лежыт уж на Пряшівскій Руси, є оно такой граничным селом медже як раз тым русиньскым реґіоном на Словациі а нашом Лемковином. Лемковину од Пряшівщыны одділят лем ріка Попрад. Так мож сміло речы, што Русиньска Ватра в Малым Липнику є і правдивом Лемківском Ватром, на котрій годны ся гостити і Лемкы з Польщы.

Головна сцена

Проґрам подіі передвидженый є на три дни. Зачне ся він в пятницю по 18.00 на головній сцені выступами дітячых фольклорных колективів. Пак в части проґраму «Співы мого роду» пройде неконкурсова переглядка лавреатів послідніх річників Фестівалю «Співы мого роду».

Досправдовом звіздом пятницьового вечера буде коцнерт русиньского солисты Штефана Штеця, якій выступит зо свойом ґрупом Файта.

Суботній проґрам на головній сцені зачне ся о год. 16.30 частю «Мозаіка реґіону», в котрій запрезентуют ся такы колективы і артисты як Барвінок, Кечера, Вырховина, Черговчан ци Mария Maмрілльова. В дальшій части «Витайте сусіде», яка выстартує о год. 18.30, будут ся презентувати слідуючы выступуючы: іщы раз Черговчан, Маковиця зо Свидника, Tимофей Федор, Растислав Голота і Олена Копчова, Дені Больф і Каролина Дупанова.

Вечерній суботній проґрам буде під наголовком «Образкы зо східньой Словациі». То тематичне видовиско Фольклорного Ансамбю Борєвка з Кошыц і Народной Музикы Матея Toпoльовского.

Кульмінацийным пунктом суботнього проґраму буде великє паліня ватры. Хоц на Лемковині привыкли сме, што положыня ватряного огня все є на початку подіі (такой як Лемківска Ватра), то Русиньска Ватра хоц тырват все од пятниці, загорит поправді аж пізным вечером в суботу.

Положыню огня буде товораришыла музика і забава при участи народных капель і фольклорных колективів. Ватраный оген є символом єдности, спільных стремлінь, думок, мрий – прото тіж акция положыня огня в Малым Липнику прибрала характер ґруповой діі.

Вступне на ареал Русиньской Ватры є для дорослых і діти од 11 років 6 евро (пятниця), 7 евро (субота), або 10 евро за дводньовый білет. Сеньоры і молодшы діти платят 4 евро (пятниця), 5 евро (субота), а за два дни 6 евро.

Школа танця, выставы, доповіди

Іщы в пятницю для участників буде «Школа танця» з Растиславом Голотом, де буде мож вывчыти основны крокы для русиньскых танців, а при тым вшытко буде при народній музиці капелі Радослава Кертіса.

Русиньска Ватра в Малым Липнику каждый рік є богатша і в додатковы акциі. Буде мож на ній видіти выставу фотоґрафій Mилянa Maласта «Moлитва дерева». Будут тіж дротарскы творчы варштаты з Микулашом Деревяником.

Субота буде проходила і при участи дискусий на русиньскы темы. Буде то бесіда під наголовком «Язык як част достоменности народа?». Дискусия пройде в рамках публичного награня Бесіды НЕВ – Редакциі народностного высыланя Радия Патрія.

Під вечер пройдут дальшы бесіды. «Переміны русиньского oблечыня в просторі і часі» – дискусия з Домініком Сакмаровом получена з выставом на тоту тему. Члены головного орґанізатора – молоды.Русины – оповідят о своій штоденній діяльности, што буде і причынком до дальшой дискусиі в суботній вечер.

В суботу друга част «Школы танця» – одбуде ся при участи Славомира Ондейка, а при тым забава при гудаках Maтея Toпoльовского.

Не мож забыти і на зону для діти. Наймолодшых будут забавляти акторы Театру Александра Духновича в Пряшові, Зузанна Ковальчыкова і Ладислав Ладомиряк.

Вчас Русиньской Ватры буде мож посмакувати традицийну русиньску кухню. Стравы будут представлювати поєдны села.

Недільный проґрам зачне ся о год. 10.30 Божеском Літургійом в місцвевым храмі свв. Космы і Даміана. По богослужыню, в церкви вызвучыт концерт духовных пісен в поданю Іваны Брілловой.