Сумар дня на 2. липця/юлия 2024 р.

Приносиме вам сумар медияльной ґрупы ЛЕМ.фм+ на ден 2. липця/юлия 2024 р.

Лемковина стратила выдатного сницаря, різбяря абстракциі, ікон, народного артисту

З прикрістю інформуєме, штo в неділю 30. червця/юнія нагло вмер Богдан Карел, мастер різбы з Лося. В грудни/децембрі святкувал бы округлый ювілей 70. років. Творил в традицийній сницарскій формі популярній на Лемковині. Зробил парудесят канонічных ікон в формі пласкорізб, здобліня архітектонных елементів будинків, занимал ся тіж пласкорізбом. Богдан Карел был м.ін. стипендистом Міністра Культуры і Нацийональной Спадковины, Мастером Традициі, а в плянах на будуче мал основати Лемківску Школу Різбы в улюбленым Лоси. Выставлял по ріжных містах Польщы і заграницьом, м.ін. репрезентувал лемківскє народне ремесло на Днях Лемківской Культуры в Празі, мал індивідуальну выставу в Музею Никыфора в Креници в рамках ХХІІІ Економічного Форум. Його абстракциі нашли ся серед інчых творів на ґруповій выставі «Внутрішній і зовнішній простір. Образ Лемковины в сучасній штуці» в Етноцентрі Коросняньской Землі. Своі роботы вказувал м.ін. в Ґорлицях, Тыличы, Кракові ци Бардийові. Вічна Памят.

Вакацийны, природничы занятя в Маґурскым Парку

Маґурскій Нацийональный Парк просит на варштаты з циклю «Загорожыня і охорона земноводных». Подія пройде 6. липця/юлия і зачне ся о 14.00 год. од короткого выкладу в Музейно-Едукацийным Осередку в Крампній. В другій части стрічы участникы возмут участ в тереновых варштатах з презентацийом моніторінґу та діянь з обшыри активной охороны. Головным мотивом першых варшататів буде гірскій кумак і салямандра плямиста. В плянуваных в 2025 році варштатах участникы будут мочы дознати ся про активну охорону решты земноводных з Маґурского Нацийонального Парку. Окремо Парк просит на першы того рока вакацийны тереновы варштаты. Занятя будут проходити в каждый четвер в ріжных частях парку. Першы (4.07) пройдут на природничо-едукацийній стежці Галбів-Камін. До участи прошены сут діти в віку од 8. років разом з опікунами. Обовязуют скоршы телефонічны записы в одділіню Едукациі Парку.

Новы інвестициі в Яслисках

В Яслисках будут ремонтувати забытковы, камінны пивниці датуваны на XV і XVI ст. Певничкы колиси служыли як склад вина, коли то через місточко переходил Мадярскій Шляк. До теперішніх часів лишило ся іх коло 30, єднак ремонтуваны будут лем пивниці злокализуваны при рынку, під будинком Уряду Ґміны і під основном школом. По реновациі поміщыня будут полнити функцию конференцийных і едукацийных саль та служыти як простір для туристичных подій. Реконструкция обнимала буде усуніня перебудувань, очыщыня каміня, осушыня, одсоліня та зміцніня конструкциі, вернут тіж ориґінальны входы. Выконавці можут зголошувати своі оферты реновациі до 23. липця/юлія тр.

Найцікавшы атракциі Польщы

Закінчыл ся конкурс орґанізуваный сайтом polskieszlaki.pl на найліпшы атракциі, в котрым інтернавты вказали своі улюблены вакацийны місця. Конкурс має характер загальнопольскій і проходил в осмох катеґориях: Новины і одкрытя, Замкы і палацы, Паркы розрывкы, Музеі і Скансены, Родинна рекреация, Природничый азиль, Горы і вершкы та атракцийны місцевости. Серед выріжненых нашли ся аж дві атракциі з Малопольщы – Ґалицийскє Місточко в Новым Санчы та Видокова вежа в Креници.