Народностный выбор кінчіть. Меншыны дістануть окрему Раду влады

Депутаты Народной рады Словацькой републікы в четверь 27-го юна 2024-го року схвалили зміны в компетенчнім законі. Новелізація закона значіть зміну і про народностны меншыны.

Подля новой леґіслатівы скінчіть свою діятельность Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность. Намісто нього выникне в септембрі Рада влады Словацькой републікы про народностны меншыны.

Так само будуть установлены уповномоченый влады СР про народностны меншыны і уповномоченый влады СР про ромскы комуніты як постоянны уповномочены.

Уряд влады СР буде подля схваленой пропозіції централным орґаном державной справы про творіня у реалізацію державной політікы а коордінацію повніня задач в области прав народностных меншын. Ту треба додати, же тота зміна не буде дотуляти ся областей народностных політік, котры має в компетенції Міністерство културы СР або і Міністерство школства.

Окрема Рада влады СР про народностны меншыны бы мала значіти посилніня прав меншын. Покля меншыновый выбор быв лем порадным орґаном Рады влады Словацькой републікы про людьскы права, народностны меншыны і родову рівность, причім рада є порадным орґаном влады, теперь будуть меншыны посередництвом рады прямым порадным орґаном влады.

„В септембрі заникне Выбор про народностны меншыны і выникне нова Рада влады СР про народностны меншыны, котра буде мати силнішы компетенції,“ написав на офіціалнім сайті на сіті Facebook уповномоченый влады СР про народностны меншыны Акош Горонь.

За його словами є цільом принести міцнішый голос меншын і ефектівніше творіня публічной політікы. „В повязаню з тым приходить і ку сімболічному посилніню мойой посады, кедьже вєдно із уповномоченым про ромскы комуніты зо закона стаєме постоянныма уповномоченыма влады,“ написав Горонь.

Припоминаме, же до 2010-го року існовала окрема Рада влады СР про народностны меншыны. Втогдышньов змінов компетечного закона тота рада заникла, і выникла Рада влады СР про людьскы права, народностны меншыны і родову рівность. В повязаню з тым пак од 2011-го року почав існовати Выбор про народностны меншыны і етнічны ґрупы.

Покля не дішло ку змінам компетенчного закона у 2010-ім році, меншыны не мали уповномоченого але підпредседу влады про народностны меншыны, значіть міцнішу позіцію. Новелізація закона теперь зохаблять уповномоченого.

Створіня Рады влады Словацькой републікы про народностны меншыны владный кабінет Роберта Фіца приобіцяв на своїм выїздовім засіданю в Ґаланті на кінцю марца того року. Там членове влады і коалічных партій мали переговоры з представителями партії Magyar Szövetség – Maďarská aliancia, котра пак підпорила посередництвом свого председы в другім колі презідентьскых волеб коалічного кандідата і сучасного презідента Петра Пеллеґріні.

Посліднє засіданя Выбору про народностны меншыны і етнічны ґрупы одбуде ся 2-го юла в Братіславі.