Сумар дня на 27. червця/юнія 2024 р.

Приносиме вам сумар медияльной ґрупы ЛЕМ.фм+ на ден 27. червця/юнія 2024 р.

Стріча журналу «Отцюзнина»

Як інформувал русиньскій журнал «Отцюзнина» з Підкарпатя на своїм вебсайті, в понедільок 24. червця/юнія одбыло ся засіданя редакцийной колеґіі, спілробітників і його дописувателів. В часі подіі підняли ся важны вопросы за языкову і редакцийну політику ци будучніст выдаваня. На засіданю были тот раз присутны і представникы америцкых Русинів. Посмотріти роботу редакциі пришол проф. Павел Роберт Маґочій за Карпаторусиньскій Науковый Центр, котрый має важну ролю в тым, же журнал подарило ся в минулым році одновити, а так само Мария і Мері Кетрін Сільвестрі з Фундациі Джона і Гелен Тімо. Засіданя проходило в Ужгороді, де америцкы Русины пришли з Пряшова, кєд же три тыжні присвятили тому місту з нагоды проходжыня Studium Carpato-Ruthenorum 2024 – Медженародной Літньой Школы Русиньского Языка і Культуры. В засіданю брали участ м.ін. і голова Народной Рады Русинів Закарпатя Євген Жупан ци голова орґанізациі Карпатскій Русин Василь Щербей.

Руска Бурса в проєкті FOSTERLANG

Европейска Комісия признала великій ґрант з проґраму Horizont Europe на реализацию проєкту FOSTERLANG, завдякы котрому будут выпрацуваны стратеґіі підпераня языковой ріжнорідности в Европі. Серед парунадцетьох інституций з цілой Европы, в проєкті бере участ лемківска соспільна орґанізация – Стоваришыня «Руска Бурса »в Ґорлицях. FOSTERLANG то ініциятива, котра тыкат позитивной трансформациі способів охороны, хоснуваня і промоциі меншыновых языків в Европі в контексті соспільной динамікы, котра лучыт домінуючы і меншыновы языкы. На зреализуваня проєкту Европейска Комісия признала медженародному консорциюм ґрант высокости 3 млн евро. Координатроком проєкту є проф. Юстина Олько з Варшавского Університету, яка веде Центр Заанґажуваных Досліджынь над Культуровым Тырваньом на Выділі «Artes Liberales». Лідером проєкту є Варшавскій Університет, партнерами м.ін. науковы єдиниці і інституты з Франциі, Іспаніі, Нідерляндів, Ірляндиі, Норвеґіі, Австриі ци Великой Британіі. З Польщы участ в проєкті берут тіж Університет ім. А. Міцкєвича в Познані, Стоваришыня Вілямівяне і Ная Школа з Кашеб.

Стартує «Світ під Кычером»

Уж заран зачынат ся тогорічна едиция Медженародного Фольклорного Фестівалю «Світ під Кычером». 27. едиция зачне ся концертом в Олесници (о 17.30 год. буде хоровід). Орґанізатором подіі є Лемківскій Ансамбль Пісні і Танця «Кычера». Фестіваль буде проходил од 28. червця/юнія до 7. липця/юлия. Выступлят ансамблі м.ін. з Іспаніі, Украіны (Ормане), Мексику, Болгариі ци Словациі. Того рока Словацию буде репрезентувал русиньскій ансамбль Маковиця зо Свидника. Другым русиньскым колективом з заграниці буде ансамбль з Руского Керестура з Сербіі. Фестіваль загостит тіж до Лісця, Шпротавы, Польковиц, Ліґниці, Волова, Поляниці – Здрій, Рудной, Замениц і Ліґницкого Поля. То в більшости тоты місцевости на західніх землях, в котрых прожыват дост великє чысло лемківского населіня.

Interreg Польща – Словация 2021-2027

Веце міст і сел в Пряшівскым Самосправным Краю буде реализувало завдякы Проґрамови Interreg Польща – Словация 2021-2027 атракцийны проєкты туристичного руху, електромобільности і інституцийональной спілпрацы. Комітет моніторуваня проґраму схвалил про територию ПСК 11 проєктовых замірів за 11,1 млн евро. Реализувати ся будут в періоді од 2024 до 2027, і іх цілковита вартіст для словацко-польского пригранича представлює близко 29 млн евро. Част тых проєктів буде реализувало ся в русиньскых реґіонах. Такым проєктом є наприклад Місце про час, на котрым бере участ Шаришскій Музей в Бардийові. Замір підпорит розвиток черезграничной інтеґруваной туристичной оферты польского музею в Коросні, як і бардиівского музею. Місто Свидник буде партиципувало на проєкті Вєдно за здорове пригранича.