«Біла Вода. Біль непамяти», бесіда з Домініком Цєпляк і Камільом Федериґом – пятниця, 10.30 год.

Осіню 2023 рока Домініка Цєпляк і Каміль Федериґа оборонили на Выділі Архітектуры Краківской Політехнікы дипломову роботу, котром был проєкт пн. «Біла Вода. Біль непамяти». То проєкт посвяченый селу Біла Вода на Шляхтівскій Руси.

Проєкт был выріжненый І нагородом XI едициі Конкурсу для Молодых Архітектів Builder4future місячника «Builder» та І нагородом в загальнопольскым конкурсі на найліпшу ліценциятску і маґістерску роботу зо схоснуваньом бесідуваной істориі.

Проєкт складат ся з трьох части – теоретичной, аналитичной і практичной. В теоретичній части представлена є істория села од першых записків по выселіня і по сучасный час, проанализуваный є руралистичный розвиток, елементы культуры, штукы, архітектуры, звыкы і штоденніст.

«Аналитична част (2) то есеі, котры піднимают темы теориі і психолоґіі архітектуры. В моій части пропоную архітектонны споспобы перцепциі минулого через архітектуру зо схоснуваньом ріжных смыслів (vide Rasmussen, 1959/2015; Heselgren, 1975; Zumthor, 1955/2010, Pallasmaa 1996/2012) получены з теорийом сліду, як конститутивного елементу достоменности місця (Lasiewicz-Sych, 2000). Домініка зас розсмотрює квестию влияня архітектуры на поєдны смыслы в процесі терапіі фізичного болю і травмы. Есеі сут теоретичном основом нашых проєктів» – можете прочытати з архівальной бесіды з проєктантами опубликуваной іщы перед обороном на нашым портали.

На практичну част складат ся проєкт трасы з едукацийныма павільонами о сучасній формі (шіст павільонів) та проєкты: Ізбы Забытого Села і Колибы Терапіі Болю і Травмы.

Ідеово проєкт піднимат тему болю, котрый може быти розумленый і як психічный, і так фізичный біль, та квестиі памяти і забытя.

«Проєкт Біла Вода. Біль непамяти был для нас вызваньом, бо вымагал збалянсуваного підходу до проєктуваня, увзглядняючого і еколоґічны квестиі, і соспільны та історичный ци культуровый контекст, а окрем того вражливого трактуваня етнічной меншыны, яком сут Лемкы. Культурово-Історична Стежка мала за задачу не лем бесідувати о доли выселеного села, але тіж забезпечыти терен перед комерцийныма інвестициями, што ведут до затераня слідів по селі» – оповідают проєктанты.

Послухайте бесіды з Домініком Цєпляк і Камільом Федериґом уж заран, в пятницю 28. червця/юнія 2024 р. о год. 10.30, повторіня в ночы з пятниці на суботу 28. червця/юнія 2024 р. о 3.00 год. та в суботу 6. липця/юлия о 9.00 год.

фот. © Домініка Цепляк і Каміль Федериґа