Вмер Володимір Біланин, русиньскый актівіста і меценат

Як інформовав сайт Русинські писателї Подкарпатя, 11-го юна 2024-го року вмер у віці 89 років Володимір Біланин, єден із лідерів русиньского возродного руху по 1989-ім році на Підкарпатю.

Народив ся Володимір Біланин 9-го апріля 1935-го року. У минувшому быв довгы рокы директором Ужгородьского дослідньо-експеріменталного завода нештандартного заряджіня, при котрім фунґовав народный фолклорный ансамбель із 120-ма членами, якый вів. Посередництвом того ансамблю Володимір Білянин пошырьовав русиньску културу по цілім Совітьскім союзі, кедьже ходили выступати по цілій державі, і кедь Русинів офіціално не было.

По політічных змінах 1989-го року быв Володимір Біланин меджі тыма, котры пережывали за свій народ і хотіли йому принавернути права. Актівно залучів ся на початку 1990-ых років до возродного руху на Підкарпатю.

Біланин быв членом презідії Народной рады Русинів Закарпатя ці членом презідії Ужгородьского общества імени Александра Духновіча. Так само быв членом комісії, котра уділює Премію Александра Павловіча за русиньску літературу.

Сам быв великым меценатом русиньской културы, окремо выдаваня книжок. Вдяка його фінанчній підтримці вышло множество публікацій. Як колись повів писатель Іван Петровцій, котрый мав свій Бовт Файні Книгы в Ужгороді, майже ани єдна русиньска книжка не вышла без участи Біланина. Давав із своїх грошей, хоць уж быв на пензії, або знав позганяти спонзорів.

З послідніх выдань, котры могли быти надрукованы і вдяка грошам або ініціатіві Володиміра Білянина, можеме спомянути книгу Русинські співанкы, котру позберала і упорядковала Олґа Прокоп, або збірку Казкы з телевізора, в котрій позберано 80 приповідок народів світа, якы Олґа Прокоп у 2019-ім році розповідала діточкам в рамках телевізного проєкту.

„Володимір Федоровіч Біланин лишыв глубокый слід у сердцях многых людей свойов одданов роботов на благо русиньского народа. Його вклад до розвоя русиньской културы і общественного жывота тажко переоцінити. Він быв не лем лідером і актівістом, но і сердечным а добрым чоловіком,“ пише ся на сайті Русинські писателї Подкарпатя. Вічная память!