Сумар дня на 6. червця/юнія 2024 р.

Приносиме вам сумар медияльной ґрупы ЛЕМ.фм+ на ден 6. червця/юнія 2024 р.

«Лемківскій Пікнік» в Гартсдейль

В неділю, 23. червця/юнія в америцкым селі Гартсдейль близко Йонкерсу пройде дальша едиция «Лемківского Пікніку». Карпаторусиньскій Центр «Лемко Голь» орґанізує подію каждого рока близко Русаля, так же єст она принимана через участників як «русальный» пікнік. Пікнік лемківской еміґрациі на східнім берегу ЗША то за каждым разом нагода на стрічу родаків з Йонкерсу, Ню Йорка і інчых меньшых місцевости. Сеса подія то єдна з головных, якы протягом рока орґанізує «Лемко Голь». В проґрамі окрем доброй атмосферы і лемківской музикы є тіж буфет полный ідла і напитків. Деталі глядайте в орґанізаторів.

Владикы Грекокатолицкой Церкви на Словациі в Римі

В неділю, 2. червця/юнія до Риму пришли єпископы – члены Рады Єрархів Грекокатолицкой Церкви на Словациі, жебы приєднати ся до делеґациі словацкых римокатолицкых єпископів в рамках візиты Ad limina apostolorum. Владыкы вчас цілого тыжня мают обходити окремы римскы уряды, жебы там презентувати стан своіх єпархій за послідніх сім років. До Риму за Грекокатолицку Церков на Словациі пришли владыка Йона Йосиф Максим – архієпископ і митрополита пряшівскій, архієпископ Кірил Василь – кошыцкій єпарха, владыка Петро Руснак – братиславскій єпарха і владыка Мілян Лах – помічный єпископ братиславской єпархіі. Вчас другого дня, грекокатолицкы єрархы завитали до Дикастериі для східніх церкви. Митрополита пряшівскій представил свою церков. Кыр Йона на кінци подякувал за принятя і запросил кардинала Ґуджеротті прити на Словацию. Ad limina apostolorum – дословно «Ку порогам апостолів», є означыня повинной візиты єпархіяльных єпископів Католицкой Церкви встановленых церковным правом папы римского.

Неодолга дальша едиция Фестівалю «Світ під Кычером»

В днях од 28. червця/юнія до 7. липця/юлия проходила буде 27. едиция Медженародного Фольклорного Фестівалю «Світ під Кычером», якій орґанізує ліґницкій Лемківскій Ансамбль Пісні і Танця «Кычера». В часі тогорічной подіі выступлят м.ін. ансамблі з Іспаніі, Украіны (в тым припаді меншына – Ормане), Мексику, Болгариі ци Словациі. Як раз того рока Словацию буде репрезентувал русиньскій ансамбль Маковиця зо Свидника. Другым русиньскым колективом з заграниці буде ансамбль з Руского Керестура з Сербіі. В тот же спосіб вчас фестівалю презентуваный буде русиньскій фольклор з ріжных реґіонів. Фестіваль загостит до Олесниці, Лісця, Шпротавы, Польковиц, Ліґниці, Волова, Поляниці – Здрій, Рудной, Замениц і Ліґницкого Поля.

На Словациі ліквідую наслідства теперішніх злив

Во Вранові над Топльом на Словациі продолжуют з ліквідацийом наслідків злив. В місті є выголошена третя ступін зливовой активности по вітірковым інтенсивным дойджы, котрый спричынил выливы в містскій части Чемерне. Єндака ступін є выголошена і в селі Каменна Поруба, вранівского окресу. Вода пошкодила коло 40 метрів ходника перед основном школом, пошкоджене є корыто потока, залляло і пивниці в десятьох хыжах. Друга ступін є в окресі Вранів над Топльом выголошена в селах Давидів і Словеньска Кайня. Така сама ступін є і в бардиівскым окресі – в селах Мальців, Копривниця і Ливів.