Єпіскопи Рады єрархів на Дікастерії про восточны церькви

В неділю 2-го юна 2024-го року до Рима пришли єпіскопи – членове Рады єрархів Ґрекокатолицькой церькви на Словакії, жебы приєднати ся ку делеґації словацькых римокатолицькых єпіскопів в рамках навщівы Ad limina apostolorum.

Почас цілого тыждня мають навщівльовати окремы римскы уряды, жебы там презентовати стан своїх єпархій і дієцез за послідніх сім років. Інформовав о тім Пресовый центер Кошыцькой єпархії.

До Рима за Ґрекокатолицьку церьков на Словакії пришли Його Высокопреосвященство Йона Йосиф Максим – архієпіскоп і митрополіта пряшівскый, архієпіскоп Кіріл Василь – кошыцькый єпарха, владыка Петро Руснак – братіславскый єпарха і владыка Мілан Лах – помічный єпіскоп Братіславской єпархії.

Почас другого дня, 4-го юна, ґрекокатолицькы єрархы завітали на Дікастерію про восточны церькви (бывша Конґреґація про восточны церькви, позн. ред.). То головна дікастерія про восточны католицькы церькви, яка має власти над єпархіями, єпіскопами, духовенством, монахами і віруючіма восточного обряду.

Єпіскопів прияв префект дікастерії кардінал Клаудіо Ґуджеротті, підсекретарь Монс. Філіппо Кіампанеллі і офіціал дікастерії Монс. Олександр Сапунко.

Кір Йона в імени Ґрекокатолицькой церькви на Словакії поздоровив веджіня дікастерії і єдночасно представив церьков, котрой є головов, і найважнішы моменты з їй жывота за період од послідньой навщівы Ad limina apostolorum. Голова Ґрекокатолицькой церькви на Словакії так само спомянув найважнішы вызвы, котры стоять в найблизшій будучности перед ґрекокатоликами на Словакії.

Як пише Пресовый центер Кошыцькой єпархії, кардінал Ґуджеротті выразив велику радость, же Рада єрархів є по довшім часі комплетна, повно фунґуюча, і може з новов енерґійов наповно робити. Робота Рады єрархів як найвысшого орґану митрополітной церькви обновила ся по двох роках, котры перешли меджі абдікаційов бывшого архієпіскопа і митрополіты Йоана Бабяка і інтронізаційов кір Йоны.

Почас стрічі были обговорены різны пункты, передовшыткым літурґічны і юрідічны вопросы, духовный жывот священиків і їх родин, вопрос покликань до священства і формації в семінарії, душпастырьства в загранічу, односины з іншыма ґрекокатолицькыма церьквами як і екуменічны односины.

Кір Йона на кінцю подяковав за приятя і запросив кардінала Ґуджеротті на навщіву Словакії. В імени Рады єрархів му передав подарунок – найновішы выданя мап Ґрекокатолицькой і Римокатолицькой церькви на Словакії.

Ad limina apostolorum  – дословно „Ку порогам апостолів“, є означіня повинной навщівы дієцезных або єпархіалных єпіскопів і далшых функціонарів Католицькой церькви встановленых церьковным правом Вселеньского Архієрея.

Мала бы мати пятьрічный інтервал. Єпіскопи подавають Папови римскому інформацію о стані у своїй дієцезі або єпархії ці церьковній громады. Так само єпіскопи навщівлюють окремы дікастерії і папскы рады, жебы їх інформовати о сучаснім діяню на своїй церьковній теріторії.