Дотациі на консервацию забытків в ґорлицкым повіті

Соймик Малопольского Воєвідства в часі VI засіданя, котре одбыло ся 23. лютого т.р., піднял рішыня о спертю в 2015 році консервациі забытків на териториі Малопольщы сумом 3,5 млн зл. Грошы презначены останут на 129 задач, серед котрых аж 31 тычыт ся ґорлицкого повіту.

В сумі самоуряд малопольского воєвідства передаст в тым році на забыткы Ґорличчыны 695 тис. зл. В більшости дотациі підут до находячых ся на териториі ґорлицкого повіту парохій ріжных віроісповідань і презначены останут на ремонт і консервацию сакральных объєктів, як тіж іх допосажыня. Найвекшу дотацию 40 тис. зл отримала Ґміна Лужна на консерваторскій ремонт тереновых сходів, стежок і опоровых мурків на воєнным цмонтери но. 123 з часів І Світовой Войны. На консерваторскы роботы на воєнных цмонтерях грошы позыскало тіж Місто Ґорлиці (30 тис. зл) як тіж Ґміна Мощениця (25 тис. зл).

А так розкладают ся тогорічны дотациі в ґорлицкым повіті на консервацию забытків:

1. римокатолицкы парафіі – 234 000 зл
2. православны парафіі – 215 000 зл
3. грекокатолицкы парафіі – 142 000 зл
4. єдиниці територияльного самоуряду – 95 000 зл
5. позаурядовы орґанізациі – 9 000 зл

Більше інформаций і докладну розписку поєдных задач, на котры остали приділены дотациі, найдете на портали terazgorlice.pl.