«Слово» – Неділя розслабленого – неділя, 9.00 год.

Пережываме праздник Пасхы. Торжество всіх торжеств. Но днешна неділя якбы не мала прямо одношіня ку празднику Пасхы. Ісус приходить до Єрусалима, де ся недалеко храму находила вівча купальня. Там было много хворых, сліпых, калік і сухорлявых.

Были там зато, бо очековали, же там можуть набыти здравя. Бо ангел сходив на часы і колотив воду. А хто вошов по сколотіню до воды, набыв здравя, будьяку бы мав хвороту. Но міг то зробити лем єден. Лем тот, хто першый вошов до воды, быв выздравленый.

Ісус там находить чоловіка, котрый довгы рокы терпить на паралізу. І звідує ся го: Хочеш выздравити? А він одповідать, та хочу, але не мам чоловіка, хто бы мене зніс до купальні, як сколотить ся вода. А Ісус на то: Возьмий свою постіль а ідь. Тот чоловік взяв пюостіль і перед вшыткыма одышов з того місця.

Через тото слово нам Ісус говорить вшыткым: Коли тот чоловік одповів, же не мать никого, Ісус йому і нам говорить: Ты не маш никого, ты опущеный, може родічі тя опустили, твої приятелі тя опуитили. Но маш когось іщі векшого. Маш самого Бога. Котрый пришов ту про тебе.

А коли тот чоловік ішов, несучі постіль, быв з погляду Жыдів непригодный час. Была тогды субота. Но тот чоловік одповів, тот, котрый ня выздравив, мі повів: возьмий свою постіль. А я вірю його слову.

Так видиме, же Ісус выздравив нелем його тіло, але і душу. Тот чоловік іде до церькви, де дякує за своє выздравліня. Там його Ісус нашов і повідать йому: Ты здравый, уж веце не гріш, жебы ся з тобов не стало дашто гірше. Та што гірше могло быти од того, што уж зажыв? Вічна погыбель.

А так тым словом Воскресшый Господь черезу того чоловіка пригварять ся ку нам. Указує, же тото ыло наслідком гріха. Но Ісус йому не вытыкать, як жыв тот чоловік, якых гріхів ся допустив. Лем із любви напоминать. Не вертай ся назад. Бо смерть тя може захопити в гріху а стане ся з тобов, што я не хочу. Вічна погыбель пекла.

Так днешнім словом Ісус нам говорить: Встань з рабства гріха, я єм переміг гріх. І єм приготовленый тобі одпустити вшытко. А тыж: І не вертай ся назад до гріха, жебы ся з тобов не стало дашто страшне – вічна погыбель. Бо я єм пришов, жебы дати жывот, а не смерть. Хрістос воскрес!

В неділю, 26. мая 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. мая 2024 р. о 12.00 год. і 27. мая 2024 р. о 2.00 год. за русиньскым часом.