“Carpathia” Мароша Крайняка в Х едициі Літературной Преміі Середньой Европы АНҐЕЛЮС

До Х едициі Літературной Преміі Середньой Европы АНҐЕЛЮС остала зголошена перша част трилоґіі Мароша Крайняка Карпатія.

То книжка, в котрій автор роздумує над будучым Русинів не лем з Пряшівщыны, але його прогулька односит ся і до інчых русиньскых (і не лем) територий – Лемковины і Підкарпатской Руси та дальшых земель. Єй героі, будучы реальныма, більше-меньше знаныма, особами, вміщеныма в сучасны та історычны подіі (напр. Енді Варголь, ци Теодор Ґоч) выступлюют попри інчых – выдуманых автором – героях і ситуациях.

Карпатія, окрещена в Польщы як перша част “лемківской трилоґіі” Крайняка, была переведена на польскій язык (тлумачыня: Вероніка Ґоґоля) і выдана в 2014 р. Друга част, Ентропія (в тлумачыню Мілоша Валіґурского) выйде по польскы в 2015 р.

Літературна Премія Середньой Европы АНҐЕЛЮС то конкурс з прозаторской творчости презначений – як легко ся додумати – для творців з Середньой Европы, выданых по польскы. Можут в ним взяти участ писателі з 21 держав: Альбаніі, Австриі, Білоруси, Босні і Герцеґовины, Болгариі, Естоніі, Литвы, Латвіі, Македоніі, Молдовы, Мадяр, Німец, Польщы, Росиі, Румуніі, Сербіі, Словациі, Словеніі, Украіны, Хорвациі, Чешской Республикы.

Іщы лем до кінця лютого 2015 мож высылати своі зголошыня на адрес орґанізаторів конкурсу. Выдавці можут до нього зголосити по єдній книжці заграничного і польского автора. Головна нагорода, окрем признаного АНҐЕЛЮСА 2015 (за книжкы выданы в 2014 р.) то чек на 150 тис. зл., вручаний на торжественній ґали в Вроцлаві в жолтни т.р.

Шефом жырі, оціняючого книжкы в рамках тогорічной едициі, єст украіньскій критык, поета, есеіста і публициста Микола Рябчук.

Більше інформаций найдете на сайті орґанізатора конкурсу angelus.com.pl.

Марош Крайняк (нар. 1972 р.) – походит з Вышньой Ядловой к. Свидника на Пряшівскій Руси, тепер жыє і працує в Братиславі. В рамках русиньской трилоґіі выдал книжкы, в котрых находит ся вельо оповісти, обнимаючых красу, але тіж штоденны жытьовы чловечы проблемы і змаганя обшыри русиньско-польско-словацкого погранича: Карпатія (2011), Ентропія (2012) і Інформация (2013). Всітри были номінуваны до нагороды Анасофт Літера 2014.