Сумар дня на 16. мая 2024 р.

Приносиме вам сумар медияльной ґрупы ЛЕМ.фм+ на ден 16. мая 2024 р.

Ришард Ґалля Дорадцьом Маршалька Сойму

Вчера Маршальок Сойму Шымон Головня покликал на свого Дорадцю до справ Нацийональных і Етнічных Меншын бывшого посланця німецкой меншыны Ришарда Ґаллю. То цільком нове становиско, котре было сотворене перед даякым часом по проведеных консультациях Маршалька з представниками нацийональных і етнічных меншын. Поєдны меншыны зголошували своі кандидатуры, але остаточно на тоту посаду был запропонуваный представник німецкой меншыны.

Дальша спілпраця Прашівской Жупы з Закарпатском Областном Радом

Як інформувало Пресове Одділіня Пряшівского Самосправного Краю (ПСК), Кыів был 9. мая 2024 р. місцьом підписаня меморандуму медже Пряшівском Жупом а Закарпатском Областном Радом (ЗОР). Партнерскы реґіоны меморандумом обовязали ся зліпшыти і зінтенсифікувати взаємны односины, як тіж приготовлювати соспільны проєкты для повойновой одновы ци розвитку териториі. Меморандум пидписал председа ЗОР Роман Сарай і підпредседа ПСК Йозеф Канущак. Єдночасно тым потвердили вступ обидвох реґіонів до приготовлюваного Европского зґрупуваня територияльной спілпрацы SK-UA ЕЗТС. Участникы договору доєднали ся підтримувати розвиток взаємной спілпрацы такой на більше областях од освітньой через социяльну по еколоґічну. Словацко-украіньска спілпраца рисує ся і в дальшых сферах, якыма сут охорона здоровля і жывотного оточыня ци розвиток бізнесовых контактів. З боку ПСК актуальном остала і дальша поміч біженцям.

Великыма кроками ближыт ся Русиньскій Фестіваль

В днях од 20. до 26. мая проходил буде 12. річник Фестівалю Культуры Русиинів Словациі в Свиднику – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Орґанізаторы зас приготовили проґрам на цілый тыжден. Од понеділька до четверга будут проходити ріжного рода товаришучы акциі. В пятницю зачне ся головна част фестівалю – во свидницкым амфітеатрі, і потырват до неділі. В тым часі буде тырвал тіж 5. річник Фестівалю Орефеус – музичной переглядкы авторской русиньской творчости. Окрем ПУЛЬС-у, выступлят тіж м.ін. Владислав Сивый, Кандрачовці. Неділя буде належала головно домашнім колективам і гостям, і буде переважно в фольклорным духу. Вступне на фестіваль мож придбати на сайті www.rusinskyfestival.sk.

Стартує Польковицкій Громадяньскій Буджет

Стартує 9. едиция Польковицкого Громадяньского Буджету. Жытелі Польковиц будут мати 2 мілийоны злотых, котры будут мочы переказати на окрислены проєкты. Ґміна Польковиці на зголошуваня проєктів жде до 14. червця/юнія. Проєкты будут реализуваны в 2025 р., а выбраны в вересньовым голосуваню. 9. едицию Буджету одкрыл бургомайстер Польковиц, Вєслав Вабік. На містецкы проєкты заплянувано 1,1 мілийона зл, при чым максимальна вартіст єдного проєкту то 200 тис. зл. Зас на сельскы проєкты в ґміні Польковиці передвиджено загалом 900 тис. зл, при чым максимальной вартости 60 тис. на єдно село. До той поры каждого рока жытелі складали коло 25 проєктів.