«Печатня: Томаш Квока» – пятниця, 10.30 год. та 21.30 год.

Осіню минулого рока вказала ся книжка др. Томаша Квокы пн. «Wojwodina i jej Rusini. O języku, kulturze i historii Rusinów wojwodińskich». Публикация має понад штыріста сторін і єст ретельным компендиюм о бачваньскых Русинах.

Публикация поділена є на штырі головны части: сучасна Войводина, істория і культура, язык та реґіональна і державна языкова політика на фоні югославяньской, сербской і войводиньской етнополітикы. Книжку печатало выдавництво Księgarnia Akademicka.

З автором книжкы побесідували сме о тым, што влинуло на тото, же Русины Войводины пішли другом путю як Русины, котры выеміґрували в інчу част світа – до Америкы; якы обставины ґарантувала комуністична Югославія до зберіганя і розвиваня свого; коли і хто стоял за тым, жебы знормализувати язык тамтых Русинів і што то дало. Дослідник, якій по професиі є філолоґом, розповіл, чом войводиньскій русиньскій єст феноменом і што мают они, Русины Войводины, чого не маме мы.

Доктор Томаш Квока єст абсольвентом сербской філолоґіі Ягайлоньского Університету, автором многых публикаций на тему Сербіі і Войводины. Робит як адюнкт в Інституті Славяньской Філолоґіі Ягайлоньского Університету в Закладі Сербской Філолоґіі. Долгы рокы вюл тіж занятя в Інситуті Неофілолоґіі Педаґоґічного Університету в Кракові на напрамі/специяльности росийска філолоґія з русиньско-лемківскым языком. Єст членом Комісиі Культуры Славян Польской Академіі Знань та членом Комісиі Славянознавства Польской Академіі Наукы в Кракові.

Науково занимат ся історийом і специфіком Войводины, языками меншын той обшыри та языковом політиком в Сербіі. Окрем того –  історичном ґраматиком і історийом сербского языка, сучасным станом сербского языка та пост-сербско-хорватскых языків, народном і сучасном культуром Сербіі, популярном культуром в Сербіі.

Серед його заінтересувань сут і русиньскы языкы в Середній Европі, лемківска культура в Польщы і Войводині та балканьско-паноньска кухня.

Єст автором вельох публикаций книжковых, десяток науковых і популярно-науковых дописів, тлумачынь, м.ін. є спілавтором публикациі «Бесідуйме по лемківскы» ци редактором публикаций Выдавництва Жызновскій: «Лемківскы приповідкы і приказкы зо Святковы Великой і околиц» ци «Лемківскы співанкы зо Святковы Великой. Співник».

Бесіды слухайте в пятницю 17. мая 2024 р. о год. 10.30, повторіня того самого дня о год. 21.30, а пак в суботу 18. мая о 9.00 год. Запрашаме!