Гарасимович в Никыфора

«Лемковина в творчости Єжы Гарасимовича», од такой прелекциі зачне ся суботній вернісаж выставы «Гарасимович в Никыфора» в Музею Никыфора в Креници. Гарасимович буде гын гостити до кінця червця/юнія тр.

«Гарасимович в Никыфора» є символичном стрічом обох веиликых творців – поеты і маляря, котрых получыла любов до Бескідів, особливо до Лемковины. «Сердечно просиме взяти участ в тій артистичній гостині кольорів і слів» – запрашат Збіґнєв Волянін, куратор Музею Никыфора в Креници.

Доповід «Лемковина в творчости Єжы Гарасимовича» выголосит Барбара Балуц, полоністка, авторка вельох публикаций о поеті, провідничка ПКТТ. Пак діти з Основной Школы в Поворознику будут рецитувати вершы Гарасимовича. Вернісаж одбуде ся в суботу 10. мая о 12.00 год.

Єжы Гарасимович (1933-1999) походил з низин, вродил ся в Пулавах. Родина по войні остаточно трафила до Кракова, де поета мешкал до кінця жытя. Емоцийонально найблизшы были му єднак горы, особливо Сандецкій Бескід, де «втікал» при каждій нагоді, і котрого красу высловлювал в вершах.

Поета, звязаный уж в шкільных часах з Мушыном, в дозрілым періоді жытя часто вертал на Лемковину, до свойой мітичной «Краіны лагідности». «І днес, через свою понадчасову поезию, так близку серцям черговых ґенераций люди захопленых Бескідами і Лемковином, є гын фурт присутный. Хоц противні до Никыфора, котрый тішыл ся медженародном славом, поету Єжы Гарасимовича уж дакус забыли» – подає Збіґнєв Волянін. Нерідко молоды туристы, вандруючы по горах, захоплюют ся співаном поезийом з музиком до слів Гарасимовича, і часто ани не знают, хто єст автором чудовых вершів.

Поета особисто знал Никыфора, шанувал го і цінил його творчіст. Посвятил малярьови пару вершів. Знал о рыхтуванях до одкрытя Музею Никыфора, тішыло го тото, але здоровля не дозволило му уж на подорож до Крениці і візиту в музею. «Зато выстава тых обох артистів, котрых творчіст даяк ся дополнює, презентувана є в тым особливым місци, якым єст Музей Никыфора, має важный артистичный і історичный вымір» – пояснят Збіґнєв Волянін. «То перша так близка, артистична стріча Мастера з Крениці, як называно Никыфора, з Бардом з Мушыны».

Выстава є рыхтувана во спілпрацы з Воєвідском Публичном Бібліотеком в Кракові. Презентує жытя і творчіст выдатного поеты та його захопліня Лемковином і штуком Епіфана Дровняка. Вершы выбрала Катажына Ґжесяк. Репродукциі образів походят з колекциі Музею Сандецкой Землі, авторком ґрафічного проєкту перентуваных плянш є Беата Озґа. Выстава першыраз вказувана была в 2015 році, почестным гостьом была Мария Гарасимович, жена поеты. Тота выстава пошырена є о выбраны ориґінальны образы Никыфора та репродукцию робіт темово звязаных з вершами Гарасимовича.

В червци/юнію выставі товаришыти будут іщы: авторска стріча з др. Аланом Вайсом, автором книжкы о поеті пн. «Так як місяц. Поетицкє жытя Єжы Гарасимовича» та едукацийна прогулька «Шляком Никыфора і Гарасимовича по Лемковині».

Поета особисто знал не лем Никыфора, але тіж інчого поету, етноґрафа, соспільника, політика – Павла Стефановского, а тіж Маестра Ярослава Трохановского. Єдного разу його візиті в Білянці товаришыла камера. Позерайте на документ Катажыны Котулі і Єжы Міхалка о Ансамбли Пісні і Танця «Лемковина». В репортажы своі вершы чытат Єжы Гарасимович, сут то: Горы і люде сходят з неба, Руіны церкви в З., Через горы мочарувата дорога та Лемківскій дім.

Tryptyk Nikiforowski, Jerzy Harasymowicz

Фот. Пресовы материялы Музею Никыфора в Креници