Новым мукачовскым єпархом став Теодор Мацапула

Як оголосив Святішый Престол на своїм офіціалнім вебсайті, в середу 8-го мая 2024-го року Папа римскый Франціск призначів нового єпіскопа-ордінарія Мукачовской ґрекокатолицькой єпархії. Став ним отець Теодор Мацапула, дотеперішній сінкел в справах монашества Мукачовской ґрекокатолицькой єпархії.

Теодор Мацапула так само дотеперь быв іґуменом чернечого общества блаженого Теодора Ромжы Інштітуту Воплоченого Слова в Дубовім, Тячовского району.

Владыка Ніл Лущак, дотеперішній апостольскый адміністратор єпархії, зіставать помічным єпіскопом. Владыка Ніл рядив єпархію од 20-го юла 2020-го року як апостольскый адміністратор ad nutum Sanctae Sedis (до одкликаня Святішым Престолом). На тоту посаду быв призначеный по смерти попереднього єпархы – владыкы Міланa Шашіка. Перед тым быв на посаді помічного єпіскопа єпархії.

Владыка-номінант Теодор Мацапула народив ся 21-го авґуста 1981-го року в Крилосі, Івано-Франківской области. У 2001-ім році вступив до новіціату Інштітуту Воплоченого Слова (Istituto del Verbo Incarnato – IVE). Штудовав на Меджінародній семінарії Сан Віталіано в італійскім місті Сені, і в Центрі высшых штудій святого Бруна.

У 2007-ім році склав вічны обіты. 10-го фебруара 2008-го року быв рукоположеный на священика. Од 2008-го до 2013-го року быв на місії в Росії, де старав ся о католиків візантійского обряду. Служыв у місті Омск на Парохії Покровы Пресвятой Богородіці, в місті Сарґатьске на Парохії свв. Кіріла і Методія. Так само служыв ґрекокатоликам у містах Хабаровск і Владивосток.

В роках 2009 аж 2013 быв єпіскопом Йосифом Вертом призначеный выконовати обовязкы декана про католиків візантійского обряду на теріторії, яка є згодна з Римокатольцков дієцезов святого Йосифа в Іркутьску на Далекім Востоці.

Од 2013-го року служыть в Мукачовскій ґрекокатолицькій єпархії. В роках 2013 аж 2019 быв протоіґуменом тогдышньой Делеґатуры Зарваницькой Матери Божой на Україні. Сінкелом в справах монашества быв од 2017-го року.

У 2018-ім році здобыв тітул бакаларя гуманітных наук, у 2022-ім році здобыв ліценціат посторалного богословя. Бісідує по італійскы, іспаньскы, польскы і російскы.

„Хотів бы єм повісти, жебы сьте ся не засмучовали про мою любов до Мукачовской єпархії. Я єй досправды люблю. І Господь Бог мене покликав, жебы єм робив вшытко про їй добро,“ повів новопризначеный владыка у куртім приговорі, котрый мав у Хрестовоздвиженьскім катедралнім соборі в Ужгороді по офіціалнім публікованю інформації о новім мукачовскім єпархови.

Новпопризначеный єпарха є першым владыком на світі, котрый походить із Інштітут Воплоченого Слова.