Презідентка навщівила русиньскый ТАД. Русины были запрошены і на діскусію

Презідентка Словацькой републікы Зузана Чапутова в тыждні од 22-го до 26-го апріля 2024-го року выбрала за місце свого урядованя місто Кошыці. В Кошыцях так само як в Братіславі існує Канцеларія презідента СР, што головы держав почас своїх мандатів звыкли з часу на час хосновати.

Зузана Чапутова, котра не кандідовала на другый функчный період, і їй мандат закінчіть ся 15-го юна на полідне, коли презідентьску присягу буде складати новозволеный презідент Петер Пеллеґріні, хотіла посліднім урядованьом з Кошыць розлучіти ся з выходнов Словакійов і їй жытелями в позіції презіденткы.

У четверь 25-го апріля презідентка мала свою робочу аґенду в Пряшові. А не забыла при тім ани на русиньску народностну меншыну. Історічно першый раз голова державы навщівила русиньскый Театер Александра Духновіча (ТАД), котрый є єдинов русиньсков професіоналнов сценов у світі.

ТАД тримать язык і културу при жывоті

Презідентку Зузану Чапутову привітав директор театру Маріян Марко, котрый на початку того року быв головов державы нагородженый Прибиновым крестом ІІ. класы за вынятковы заслугы о културный розвиток Словацькой републікы. Презідентка пришла до театру почас „пробы“, і так могла видіти і дашто з кумшту членів драматічного колектіву ТАД.

По привітаню наслідовала півгодинова діскусія, на котрій брали участь нелем акторы, але і далшый персонал театру. Голова державы подяковала ся робітникам театру за то, же утримують русиньскый язык і културу посередництвом професіоналной театралной сцены. Так само підкреслила, же уменя, включно театру, є важным елементом, потрібным ділом, котре нам дає дзеркало головно в складных політічных і общественны часах.

„Вдяка Театру Александра Духновіча русиньска култура і язык тримать ся при жывоті,“ повіла презідентка.

В щірій атмосфері презідентка інтересовала ся і звідала ся на різны вопросы, котры суть з нашым театром і културов обще повязаны. Членове театру поділили ся з презідентков о свої успіхы, але так само о проблемы, з котрыма ся театер в рамках свого діяня стрічать.

„Сердечна была стріча з паном Марком, котрому єм в януарі уділила державну нагороду, і з членами Театру Александра Духновіча. Бісідовали сьме головно о утримованю і розвитку културы Русинів, котры на выході суть важнов меншынов. І якраз тот театер, як єдиный професіоналный театер на світі, котрый грає в русиньскім языку, має в жывоті Русинів ту на Словакії незаступну роль,“ інформовала по стрічі презідентка Чапутова.

Русины запрошены і на діскусію

В тот самый день вечур в Кошыцях одбыла ся Касарнях Културпарку діскусія з презідентков повязана з малым погощіньом, в рамках чого были на тоту подію запрошены особности з выходной Словакії з різных областей.

Презідентка знова не забыла ани на Русинів, котрых пак в діскусії было чути якбач найвеце. Не вшыткы, котры дістали запрошіня, могли брати участь, но і так делеґація Русинів мала шумне чісло.

На події брала участь Марька Мачошкова, котра од презіденткы у 2022-ім році дістала Медайлу презідента Словацькой републікы за вызначны заслугы о розвиток Словацькой републікы в области културы, Маріян Марко, директорка СНМ – Музея Русиньской културы в Пряшові Люба Кральова, председа Русиньской оброды Мартін Караш, довгорічна робітничка в области културы Марія Пайзінкова.

Далше брали участь писателька Людмила Шандалова і їй муж Владимір Шандала, котрый є старостом Нижньой Ядловой і председа МО РОС у Свіднику, председа орґанізації молоды.Русины Марек Гребік вєдно із женов Наталійов Гребіковов, яка є редакторков русиньской редакції Народностно-етнічного высыланя Радія Патрія, співачка і докторандка Інштітуту русиньского языка і културы Пряшівской універзіты Домініка Новота і Петро Медвідь.

Презідентка дала по офіціалній части проґраму і курте ексклузівне інтервю редакторці Наталії Гребіковій.