Про загранічных штудентів: Мож штудовати русиністіку і здобыти штіпендію 4000 евр

Пряшівска універзіта в Пряшові є єдинов універзітов на Словакії, котра дає можливость штудовати русиністіку. На універзіті діє Інштітут русиньского языка і културы, котрый є під Центром языків і култур народностных меншын.

Русиньскый інштітут має акредітованы штудійны проґрамы в бакларьскім, маґістерьскім i докторандьскім проґрамі. Теперь є можливость здобыти на штудіум русиністікы штіпендію 4000 евр на рік.

Штіпендія є про талентованых загранічных штудентів, котры мають інтерес штудовати на высокій школі в Словацькій републіці. Успішный ашпірант на штудіум може здобыти штіпендію 4000 евр на рік, значіть за бакаларьске штудіум є то довєдна 12 000 евр.

Як інформовала директора Інштітуту русиньского языка і културы Анна Плішкова, штіпендія є про тых штудентів із заграніча, котры наступлять штудовати в академічнім році 2024/2025. Як підкреслила, было бы добрі, кебы будучій штудент знав по русиньскы, а окрім того розумів і словацькый, або іншый славяньскый язык.

Условієм, жебы здобыти штіпендію, є резултат із SAT тесту, а наступліня на штудіум в слідуючім академічнім році. Реґістрація про заінтересованых є вже спущена а жадость о штіпендію треба загнати до 30-го юна 2024-го року (включно).

В припаді інтересу можете контактовати так само Інштітут русиньского языка і културы Пряшівской універзіты, з котрым мож о тій темі конзултовати.