Сумар дня 10. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 10. квітня/апріля 2024 р.

О ЛЕМ.фм і Русинах в Устриках Нижніх

Днес і заран в Бєщадскым Центрі Культуровой Спадковины в Устриках Нижніх проходит медженародна конференция пн. «Спілпраца в обшыри функцийонуваня заникаючых культур в добі домінациі масовой культуры». О лемківскых медиях, в тым очывидно о нашым радию, реферує ведуча Стоваришыня «Руска Бурса» в Ґорлицях – Наталия Малецка-Новак, а о ситуациі русиньской меншыны на Словациі з доповідю выступил наш редакцийный колеґа – Петро Медвідь. В дальшых пунктах проґраму конференциі є м.ін. доповід Петера Кудрача о ромскым стоваришыню з Гуменного ци Роберта Банькоша о формуваню ся етносів на днешнім польско-украіньско-словацкым пограничы. Конференция фінансувана є в рамках проєкту «Рафінерия Культур – ревітализация памятникового будинку Рафінериі Фанто в Устриках Долишніх на потребы Бєщадского Центра Культуровой Спадковины», котрый є дофінансуваный през Ісляндию, Ліхтенштей і Норвеґію в рамках фундушы ЕОҐ і нровежскых фундошы через проґрам «Культура».

Продолжат ремонт школы в Білянці

В жолтни/октобрі минулого рока інформували сме о тым, што Ґміна Ґорлиці рішыла провести комплексову модернізацию будівлі старой школы в Білянці. Як раз тепер продолжают роботы, котры зачали ся в лютым/фебруарі 2024 р. В рамках заплянуваных робіт є м.ін. поправа фундаментів, выміна стріхы і поправа зовнішніх стін. Реконструкциі вымагат західня част елевациі і пілнічно-західній угел. Част з елементів, котры долгы рокы служыли жытелелям Білянкы, буде лишена. То хоц-бы выгляды і двері, котры будут підданы реновациі через одчыщыня, пак імпреґнацию проти грибам. Першый етап неодолга буде завершеный. Памятковый будинок давной біляньской школы є важным місцьом і для лемківской істориі, і культуры. То місце, якє в своіх порогах долгы рокы гостило Репрезентацийный Ансамбль Лемків в Польщы «Лемковина», а пак служыло для Музею Лемківского Ремесла ім. Штефана Чергоняка покликаного Павлом Стефановскым.

Енді Варголь в Ряшові

В Округовым Музею в Ряшові од 11. квітня/апріля буде мож обзерати выставу пн. «Енді Варголь. Перед і по». Є то выстава орґанізувана при спілпрацы з Музейом Енді Варголя з Меджелабірців, експонаты презентуваны на выставі походят як раз з колекциі того музею. Выстава має заакцентувати русиньскє походжыня Варголя – буде вказана м.ін. близка реляция Варголя з мамом, Юлийом Завадзком, перша творчіст Варголя, а тіж роботы з найбарже популярного періоду короля поп-арту. Як подає Михал Быцко, творця концепциі выставы, директор Музею Енді Варголя в Меджелабірцях, проєкт експозициі єст так задуманый, жебы вказати святы символы і мотивы, котры Варголь творчо «змодифікувал», і вказати Варголя віру в Бога та його захопліня східньохристияньскым обрядом. Выставу буде мож обзерати до 16. червця/юнія тр.

Друга тура выборів бургомайстра в Польковицях

7. квітня/апріля проходили самоурядовы выборы – выбераны были представникы локальных власти. На становиско бургомайстра Польковиц кандидувало шестеро охочых: Марийоля Космідер (Kośmider), Павел Ковальскій, Кжыштоф Нестер, Роман Розмысловскій, Вєслав Вабік і Зыбачыньскій. До другой туры перешли: Роман Розсмысловскій з Выборчого Комітету Права і Справедливоси (здобыл 1679 голосів, што становит 16,57% голосів) та Вєслав Вабік, безпартийный кандидат. В першій турі здобыл він 2 856 голосів – значыт 28,19% голосів. Вєслав Вабік то знана в Польковицях особа і самоурядовец з вельолітнім досвідчыньом. Был бургомайстром того міста в роках 2006-2018. Його контркандидат – Роман Розсмысловскій, 22 рокы был директором Банку Пекао С.А. Тепер є директором до економічно-адміністрацийных справ в Польковицкым Товаристві Соспільного Будівництва. Друга тура пройде 21. квтіня/апріля.

Фот. Bieszczadzkie Centrum Dziedzictwa Kulturowego