Митрополіта Йона стрітив ся з председом і посланцями ПСК

Як інформовав говорця Пряшівской архієпархії Михал Павлишиновіч, пряшівскый архієпіскоп і митрополіта Йона у четверь 4-го апріля 2024-го року стрітив ся на Ґрекокатолицькім архієпіскопскім уряді в Пряшові з председом Пряшівского самосправного краю Міланом Маєрьскым і посланцями Заступительства Пряшівского самосправного краю, котры прияли його запрошіня.

„Гості собі посмотрили просторы Архієпіскопского уряду і Постоянну експозіцію історії Пряшівской архієпархії. В Архієпіскопскій каплічці святого Йосифа владыка Йона заспівав молитву – великодный тропарь Хрістос воскресе, і то з інтенційов за вшыткых посланців, їх родины і посланя,“ інформовав Павлишиновіч.

Перед вечерьов у куртім приговорі кір Йона окрім іншого повів, же му приходить на думку слово із Єванегелія: „Учітелю – де перебываш?“ Зато є радый, же посланці прияли його запрошіня і пришли на Архієпіскопскый уряд – до „дому“ пряшівскых єпіскопів, де жыли а діяли і його опередникы.

„Радо схосную тоту принагоду з вами стрітити ся і почати взаємно спознавати ся. Дякую за вашу роботу на благо жытелів краю а надіям ся, же і далше буде співпраца Ґрекокатолицькой церькви і Пряшівского самосправного краю розвивати ся.

Стріча была, як інформовав Павлишиновіч, знаком і выражіньом почливости односно представителів Пряшівского краю, котрого теріторія є згодна з теріторійов Пряшівской архієпархії, з боку владыкы Йоны на початку його єпіскопской службы.