Інтерреґ сфінансує ремонт доріг, але тіж проєкт звязаный з І світовом войном

Місто Ґорлиці буде реализувало медженародный проєкт пн. «GOV4PeaCE» звязаный зо спадковином І світовой войны. Доцільово місто хоче вознести Европейскій Музей І Світовой Войны. На польско-словацкым пограничы выремонтуют понад 34 км доріг.

Минулого рока місто Ґорлиці, як партнер проєкту, вєдно з десятьома інчыма підметами з шестьох держав: Словениі (головный партнер проєкту), Італиі, Бельґіі, Польщы і Мадяр зложыли внесок до Проґраму Інтерреґ Серединна Европа 2021-2027 пн. «Модель вельовымірового і меджетериторияльного заряджаня активацийом спадковины І світовой войны цілю підпераня зрівноваженого соспільно-господарчого розвитку далекых територий Серединной Европы» (орґ. «Multi-dimensional and cross-territorial governance model for activation of the World War I heritage to foster sustainable socio-economic development of remote territories of Central Europe») – «GOV4PeaCE».

Першы крокы до створіня Европейского Музею І Світовой Войны

Рішыньом Проґрамовой Комісиі проєкт достал дофінансуваня. Сумарична вартіст задачы для Міста Ґорлиці то 156 800 евро.

В центрі заінтересуваня проєкту є спадковина І світовой войны в загальноевропейскій скали. Проєкт закладат основаня, на примірі істнуючой на пограничы Словениі і Італиі, медженародной пути та туристичного проєкту («Walk of Peace»), што повязаны з історийом і місцями І світовой войны. Місто Ґорлиці в рамках задачы м.ін. зорґанізує медженародну конференцию та опрацує мериторичну концепцию Европейского Музею І Світовой Войны. Задача обнимала буде тіж інвентаризацию обєктів і місц звязаных з І світовом войном на обшыри малопольского воєвідства. Фінальным ефектом буде опрацуваня і підписаня медженародной деклярациі дальшой спілпрацы в обшыри заряджаня історичном спадковином, што односит ся до І світовой войны. Діяня Ґорлиц буде мало підпертя Інституту Істориі Ягайлоньского Університету.

Проєкт будут реализувати од мая 2024 до жолтня/октобра 2026 рока в партнерстві м.ін. з Центром Розвитку Долины Сочы (Словенія), Італийскым Музейом Воєнной Істориі (Італия), Нацийональным Парком «Полонины» (Словация) ци Стоваришыньом Карпатскій Еврореґіон (Польща).

18 млн евро на ремонты доріг

Монітуруючый Комітет проґраму Інтерреґ Польща-Словация на засіданю 21. марця тр. принял пят проєктів, тзв. резервовых, в обшыри дороговой інфраструктуры. Інвестициі в тых проєктах будут мочы быти реализуваны, кєд появлят ся ощадности в проґрамі з буджету проєктів затвердженых до дофінансуваня.

Плянуваны роботы обнимати будут м.ін. ремонт дорогы медже Санковом а Ропицьом, перебудову дорогы в Радошыцях і од села Гавай до Малой Полянкы на Пряшівскій Руси, модернізацию переходів Чырч-Лелюхів, Курів-Мушынка і Пивнична-Мнішок н. Попрадом ци розбудову скрижуваня воєвідской дорогы 993 Ґорлиці-Новый Змигород-Дукля з воєвідском дорогом 992 на рондо в Новым Змигороді.