Русиньскый Вышній Комарник навщівили майже вшыткы повойновы презіденты

В суботу 23-го марца 2024-го року на Словакії проходило перше коло презідентьскых выборів. В повязаню з тым пресова аґентура TASR принесла статю, в котрій ся пише, же русиньске село Вышній Комарник, в окресі Свідник, навщівили майже вшыткы презіденты од закінчіня Другой світовой войны.

Вышній Комарник быв ослободженый 6-го октобра 1944-го року почас Карпато-дукляньской операції (КДО), і быв першым селом на теріторії бывшой Чехословакії, котре ослободив 1-ый чехословацькый армадный корпус ґенерала Людвіка Свободы.

„Якраз з той причіны быв у северній части катастра села почас святковань пятой річніці Карпато-дукляньской операції, в октобрі 1949-го року, одкрытый Памятник 1-го чехословацького армадного корпусу в СССР з войновым цінтерьом, на котрім є похованых 565 членів корпусу павшых почас КДО і наслідных боїв в просторі северовыходной Словакії,“ повів про аґентуру жытель Вышнього Комарника і історік Воєньского історічного інштітуту в Братіславі Петро Голик.

Одвтогды на тім пєтнім місці, котре є єднов із головных частей Народной културной памяткы Дукляньске бойовиско, проходять каждый рік святкованя з тым, же на них беруть участь різны делеґації, як і презіденты.

За словами Голика є Вышній Комарник єдным із малого чісла сел на Словакії, котре навщівили майже вшыткы урядуючі презіденты, наперед чехословацькы, пак словацькы. „З вынятком тых, котры урядовали барз куртый період, в якім не быв 6-ый октобер.“

Бывшый презідент Чехословацькой републікы Едвард Бенеш навщівив бойовиско іщі перед наступліньом до функції. „То было курто перед кінцьом Другой світовой войны в апрілю 1945-го року, коли были вєдно з армадным ґенералом Людвіком Свободом посмотрити, якы шкоды наробила война,“ повів Голик.

Як доповнив, пізнішый презідент Свобода в минулости завітав і прямо до села, жебы познакомити ся з тым, як Вышній Комарник по войні обновив ся.

Як выраховав Петро Голик, із чехословацькых презідентів найчастіше ходив там Людвік Свобода, Ґустав Гусак і далшы, котры в тім часі урядовали. Із словацькых презідентів приходив Михал Ковач, Рудолф Шустер і Іван Ґашпаровіч, якый на святкованя приходив реґуларно. Презідент Андрей Кіска з нагоды 70-ой річніці КДО одкрывав вірну копію оріґіналной скулптуры чехословацькгоо вояка, котра там была, і пак єй вычеряли за іншу скулптуру в дусі совітьской лінії. „Самособов, Дуклю навщівила і презідентка Зузана Чапутова,“ доповнив Голик.

Село має того часу 69 жытелів, котры подля старосткы Даніелы Штефанцьовой на споминовых подіях беруть участь реґуларно. „Не є то першорядо з причіны офіціалных владных делеґацій ці презідентів, а скоріше зато, жебы такым способом оддали честь памятці помершых вояків,“ повіла старостка.

Жрідло фотоґрафії: FB/ Svidník-oficiálna stránka mesta.