Сумар дня на 27. марця 2024 р.

Приносиме вам сумар медияльной ґрупы ЛЕМ.фм+ на ден 27. марця 2024 р.

Підпертя для Ластівочкы 

Лемківскій Ансамбль Пісні і Танця «Ластівочка», якій діє при пшемківскым Кружку Стоваришыня Лемків, оголосил збірку фондів на свою діяльніст. Причына? Брак підпоры діяльности ансамблю Міністерством Внутрішніх Справ і Адміністрациі. Стоваришыня Лемків, як найстарша лемківска повыселенча лемківска орґанізация в Польщы, не отримало дотаций з МВСіА на основны проєкты в текучым 2024 р., якы ведены сут неперерывно од років. Окрем одмовы уділіня фінансуваня дотациі на ансамбль Ластівочка, якій діє в рамках орґанізациі, Стоваришыня Лемків не має грошів на выдаваня часопису «Бесіда» (выдавана є неперерывно од 1989 р.) ци орґанізацию тогорічного Медженародного Бієнале Лемківской/Русиньской Культуры в Креници. Як перша оголошена была як раз збірка фондів на підпору діяльности ансамблю Ластівочка, якій творят не лем молодіж і дорослы, але тіж діти – ґрупа Ластівчата. Цілый колектив рахує близко 80 осіб. Ансамбль был основаный в 2001 р. В 2017 р. Ластівочка отримала цертифікат CIOFF. На ріжных фестівалях і концертах, в котрых брала дотепер участ, отримувала выріжніня. До шумного доробку мож додати іщы «бронзовый топорец» з 45. Медженародного Фестівалю Фольклору Гірскых Земель в Закопаным. Влони колектив был нагородженый престіжным Нагородом ім. Оскара Кольберґа. Грошы для Ластівочкы мож передавати через сайт zrzutka.pl.

Лемківскій голос во світі

Престіжове німецкє выдавництво V & R unipress реклямує на своім сайті, што серед новости мож придбати книгу «Treading Paths. Lemko literature in the Years 1848-1918» авторства проф. Олены Дуць-Файфер. Анґлоязычный чытач може познати основы і меандры лемківской літературы періоду 1848-1918 років. Публикация є тлумачыньом на аґлицкій язык книжкы пн. «Literatura łemkowska z drugiej połowie XIX i na początku XX wieku» печатаной Польском Академійом Знань в 2001 році. То єдина така моноґрафія посвячена темі писменництва Лемків. Дотепер нихто веце не одважыл ся заняти полновыміровым досліджаньом літратурных засобів лемкіской меншыны. Переклад книжкы проф. Дуць-Файфер спричынил, што публикация стала ся частю меджнародной науковой циркуляциі, яка розвиват ся головні в анґлицкым языку. Публикацию треба принимати як вклад в світову науку. Заістнуваня в медженародній науковій сіти підперат досліджаня темы Лемків, нашой істориі і культуры, дає можніст заістнуваня лемківской меншыны серед шырокой публикы. Анґлоязычне выданя книжкы было печатане під редакцийом Ренаты Дампц-Ярош і Ядвіґы Кіты-Губер, а в склад наукового комітету публикациі вошли дослідникы з осмох університетів з цілого світа, м.ін. з ЗША, Франциі ци Німец. V & R unipress то высоковыспециялизуваный академіцкій выдавця.

Кжыштоф Нестер бургомайстром Польковиц?

Кжыштоф Нестер, заступця бургомайстра Польковиц, якій кандидує на уряд бургомайстра в найблизшых выборах, поінформувал в бесіді з Едитом Джымалом, што в будучій каденциі і діяльности уряду треба предовшыткым продолжати соспільны і здравотны проєкты напрямены на жытелів ґміны Польковиці, што треба продолжати інвестициі звязаны з мешкальным будівництвом, поправом комунікацийной інфраструктуры. Кжыштоф Нестер підкрислил, што в самоуряді найважнійшы сут мешканці. Кандидат на бургомайстра має богате досвідчыня як самоурядовця, через вісемнадцет років был выбераный до Рады Польковицкого Повіту достаючы довіря од жытелів. З Польковицями звязаный є од вроджыня.

Кандидаты до самоурядів – дайте ся почути на антені ЛЕМ.фм!

В звязку з ближучыма ся самоурядовыма выборами, заохочаме слухачів радия ЛЕМ.фм, а заєдно кандидатів до: Соймиків Воєвідств, Рад Повітів, Рад Ґмін, Рад Міст, кандидатів на війтів ци бургомайстрів, жебы сте присылали нам награня, в котрых поінформуєте дальшых слухачів, чом треба голосувати як раз на Вас і што хочете змінити і зробити вчас Вашого урядуваня. В будучым тыжни будеме презентувати надосланы материялы і кандидатів. Награня присылайте на адрес radio@lem.fm. Наша антена є одкрыта для Вас безкоштовно. Най Вас почуют Вашы выборці!