Сумар дня на 25. марця 2024 р.

Приносиме вам сумар медияльной ґрупы ЛЕМ.фм+ на ден 25. марця 2024 р.

Світовый ден Русинів

В суботу 23. марця святкували сме Світовый ден Русинів. Свято было схвалене Світовым конґресом Русинів в 2017 р. Ден має приопминати час, коли проходил І Світовый конґрес Русинів, якій одбыл ся 23. і 24. марця 1991 р. в Меджелабірцях. Членьскы державы СКР окрем Світового дня Русинів святкуют і окремо своі нацийональны дни.

В Пряшові стрітили ся православный і грекокатолицкій митрополиты

В четвер 21. марця тр. на Уряді Пряшівской православной єпархіі одбыла ся стріча Його Блаженства Растислава, архієпископа пряшівского, митрополиты чешскых земель і Словациі, з Высокопреосвященным кир Йоном, архієпископом пряшівскым і митрополитом Грекокатолицкой церкви на Словациі. Владыка Йона, котрый недавно принял єпископску хіротонію і был інтронізуваный до уряду митрополиты, вєдно з владыком Растиславом сконстатували, же хотят продолжувати в розвитку добрых взаємных односин медже обидвома церквами. Владыка Йона запросил владыку Растислава на візиту на Грекокатолицкій архієпархіяльный уряд.

”Вернийме до початку – права нацийональных і етнічных меншын в Польшы”

Як інформувал Калейдоскоп Культур, минулой осени вернули до традициі реґулярных стіч представників вроцлавскых нацийональных і етнічных меншын. Тема черговой стрічы то: ”Вернийме до початку – права нацийональных і етнічных меншын в Польшы”. Просят на ню Фундация Калейдоскоп Культур разом з Вроцлавскым Центром Социяльного Розвитку. Стріча пройде в пятницю 5. квітня/апріля тр. o 17:00 в Przejście Dialogu во Вроцлаві. Як подає фундация ”підчас стрічы буде припомнене, якы права для меншын сут ґарантуваны в польскым, а якы в европейскым праві. Якы орґаны на поєдных рівнях влады сут одповідяльны за реализуваня задач, маючых на ціли плеканя і підтриманя достоменности. І што то вшытко значыт для нас в практиці.” Стрічу буде вела Марийоля Абкович – Ведуча Звязку Польскых Караімів, Членкыня Спільной Комісиі Уряду та Нацийональных і Етнічных Меншын.

На Новосадскым торгу были одпрезентуваны русиньскы публикациі

В Новым Саді в Сербіі од 18. до 25. марця тр. проходит Новосадскій торг, в рамках котрого проходит і Новосадскый торг книжок. Як інформувала аґентура Рутенпрес, в четвер 21. марця представили ся на тій подіі і русиньскы выдавателі з Войводины – НВУ Рускє слово і Завод про культуру войводиньскых Русинів. Як подал на презентациі директор выдавництва Рускє Слово Борис Варґа, 20 новых публикаций, котры были выдрукуваны в попереднім і початком того рока, свідчыт о тым, же то єден з найуспішнійшых років выдавництва. Част вышла завдякы партнерству і спілпрацы з дальшыма русиньскыма інституциями і орґанізациями в Сербіі, прим. з Заводом про культуру войводиньскых Русинів ци Катедром русиністикы на Новосадскым Універистеті. Одпрезентуваны были і актуальны выданя, котры приготовила орґанізация Руска матка, член Світового конґресу Русинів. Презентувал іх голова орґанізациі Михайло Фейса.

Передсвяточна стріча в Польковицях

Днес на польковицкым Рынку проходит передсвяточна стріча. Жытелів попросил на ню бургомайстер Польковиц Лукаш Пузнєцкій. В проґрамі на передполудне заплянуваны были занятя з малювяня яєц для наймолодшых. Дальша част стрічы для вшыткых жытелів Польковиц проходит од 16.00 годины – то м.ін. святочный ярмак і варшаты. Окрем того власти міста зрыхтували для участных жытелів альбом пн. ”Ґміна Польковиці. Серце Мідьового Басену”, вказуючый красу ґміны і міста.