Руска Бурса уж по загальным зобраню. Выбрали новы власти.

В Ґорлицях 16. марця 2024 р. зобрали ся члены Стоваришыня Руска Бурса на своім шторічным загальным зобраню, сумуючым діяльніст общества за влонишній рік, але і цілю накрислити текучы і будучы проблемы, а тіж выбрати новы власти орґанізациі.

Справописы

Загальне зобраня, записане в статуті Руской Бурсы як найвысшый орґан общества, будочого зареґіструваным як стоваришыня і меншынова орґанізация, раз до рока мусит дополнити правно-формальну обшыр свойой діяльности. Зато присутным бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови, веденому в миняючій каденциі Наталийом Малецком-Новак.

Попри важности фінансовых справописів, котры для каждой інституциі сут обовязком, в меншыновых обставинах верховном остає штоденна діяльніст, якой підсумуваня і результаты нашли ся в мериторичным справописі. Руска Бурса, як орґанізация, але і самы єй члены мают постійный контакт і ведут спілпрацу з інчыма русиньскыма орґанізациями в Польщы і поза єй границями. Тым способом, не лем они, але і редакторы діючых при РБ медий з Медияльной ґрупы ЛЕМ.фм (радийо і порталь lem.fm) за минулый рік брали участ в вельох більшых і меншых акциях по цілым світі.

Хосенна і непрестанна робота ведучой через голосуваня присутных на загальным зобраню была доцінена членами стоваришыня, котры за ведучу заряду Руской Бурсы на дальшу річну каденцию зас выбрали Наталию Малецку-Новак. Заряд дополнят: Олена Дуць, Павел Малецкій, Анна Масляна, Андрий Трохановскій і Даміян Трохановскій.

Будуче

Так і Руска Бурса не може жыти лем минулым. Бурсакы бесідували тіж о текучых і плянуваных активносятх. На засіданю были порушены тіж актуальны справы і ведены проєкты, але і тото, што орґанізация плянує в близшым і дальшым часовым просторі.

До Руской Бурсы, што тішыт, приходят фурт новы люде, інтересуют ся ним штораз новы інституциі, общество завязує спілпрацу з новыма орґанізациями. Приходят і новы члены, што о тілько тішыт, же то не «мертвы душы» знаны з вельох подібного рода орґанізаций, але активны в русиньскым руху особы, якы членство в Рускій Бурсі постерігают як чест.